Nimin khan MJA Champhai District chuan annual conference vawi 36-na an hmang a; Er. H.Ginzalala, Adviser to CM (Technical), Champhai North bialtu MLA chuan a hmanpui.
Annual Conference uaptu Er. H.Ginzalala chuan, district hmasawnna atan MJA-te nen ama mimal hamthatna tur ni lo, ram tana tha tur leh hmasawnna tura thawhhona tha tak neih a duh thu sawiin Media te chu mipui leh sorkar thlunzawmtu pawimawh, a tha zawnga mipui leh sorkar kaihhruaitu an nih thu a sawi a. Mipui rawngbawl kawngah thawhhona tha an neih ngei a beisei thu a sawi bawk.
Champhai North bialtu MLA chuan eiruk kawnga filhim tura a intiam thu sawiin, hmasawnna chungchangah an duh ang leh beisei angin a thleng chak thei kher lo tih mipui pawhin kawng tam takah an hriathhiam a tul thu sawiin mipuiin an aiawha thlan tlin an nih avang erawh chuan theihtawp chhuahin hna an thawk dawn niin a sawi bawk.
Er. Ginzalala chuan Bial tana hmasawnna hnathawh kawngah sector thlan bik neia kalpui phawt tura ruahman a nih thu a sawiin Champhai District Hospital tihchangtlunna leh hnathawk indaihlohna phuhru turin hmalak mek a ni a, thingtlang mite harsatna chhawk zangkhai turin hospital tenau zawk: PHC leh CHC te tihchangtlun leh thuam that tum a nih thu a sawi a; Tourism lamah Champhai chu khualzin hmunpui ni tura hmalak tum a nih thu sawiin hemi atan hian skill development kalpuiin, a bikin thalaite an lo inbuatsaih lawk a tul hle, a ti a. Hei bakah hian Champhai khawpui leh Champhai district a hnathawh tura ruahmanna kal mek leh hmachhawp hrang hrangte sawi bawk.
Pu Laltea chuan Commerce & Industries Department hnuaiah Skill Development tih hmasawnna turin Mizoram sawrkarin crore 37 a nei mek tih a sawi a, Champhai thalaite tan a tam thei ang ber hnuh luh a tum thu a sawi bawk. Mizoram sawrkar policy lian ber te zinga mi – ‘Ban a kaih’ (Hand Holding Policy) kalpui dan tur chu peihfel thawkhat a ni tawh a, Planning Department kaltlangin kal pui a ni dawn a ni, a ti. Er. Ginzalala hian Champhai Greater Water Supply Scheme thawm tha turin ruahmanna siam mek a nih thu te, Truck Terminal sawrkar hmasa atanga buatsaih tan chu peihfel thuai anih a beisei thu te, Auditorium changtlung tak sa tura tender chhuah mek a nih thu te, zirna tih hmasawnna kawnga hmachhawp awm mek te a tarlang bawk.
Chanchinbumite chuan Champhai hmasawnna tur kawng hrang hrangte MLA hi an sawipui ve bawk a ni.