Health Minister Lalrinpuii’n Union Health Minister hnenah ZMC hmasawn zel dan tur a thlen a, Sorkar laipui chu theihtawp chuahpui turin a ngen.
Lalrinpuii, Health Minister hian nimin khan Mansukh Mandavya, Union Health Minister hmuin ZMC-in hma a sawn zel dan turte thlenin, Central sorkar chu theihtawpchhuahpui turin a ngen a. Sorkar tana a hautak lutuk dawn chuan Central sorkar kuta hlan mai ṭha ni-a an hriat thu a thlen bawk. Union Health minister chuan Mizoram sorkar chu ṭha taka thawhpuia theihtawpa tanpui a inhuam thu sawiin, state sorkarin an kalpui chhunzawm theih nan a bik taka puihna ‘special package’ pek an nih tur thuin a chhang a ni. Health Minister hian Lalduhoma, Chief Minister rawn nghalin, special package chu project te siam a, CM hova bawhzui nghal an tum a ni.
Health Minister hian Dr. Vinod K. Paul, Member NITI Aayog hmu nghalin Mizoram Health Sector leh Tourism bakah Resource moblization leh kawng dang hrang hranga hmasawnna an neih theih dan tur an sawi dun a. Mizoram sorkar hotute leh NITI Aayog member te’n hemi chungchang hi a bik taka meeting nei thuai turin an inthlah a ni.
Lalrinpuii hian Union Health Secretary a kawm bawk a, Health Department officials te’n an tawiawm a ni.