Vawiin khan Health Minister hovin COVID-19 hri kaite dinhmun leh anmahni enkawl dan kalpui mek thlirho a ni.
Health Minister Dr. R.Lalthangliana chuan thalai hrisel tha tura ngaihte pawhin nunna an chan ta mek a, damlo enkawl dan (treatment protocol) sawiho a, a tha thei ang ber tur kan hriat ang kan ngaihtuah tlan a ngai a ni, a ti a. Hrileng thawh thumna lo thleng tur nia an sawi kan lo hmachhawn dan tur pawh sawiho a pawimawh hle a ni, a ti.
ZMC-a COVID-19 hri kaite enkawltu daktawrte chuan natna benvawn nei lo zingah pawh nunna chan an awm tak thu sawiin, Home Isolation/Home Quarantine, CCC leh CCCC a awmte chu pulse oxymeter hmanga a zing thei ang bera an oxygen level check thin tura an duh thu an tarlang a. Oxygen level 94% hnuai lam a nih chuan rang taka daktawrte hnena in report nghal thin tur a nih thu an sawi.
Hri kaite enkawl an nih dan chipchiar taka sawiho niin, damdawi hmuhchhuah a la nih loh avangin tuna inenkawl mek dan bakah engtianga hmalak tur nge tihte sawi a ni a. Central sawrkarin nimin lawka treatment protocol a tihchhuah chu lo zirchianga, kan dinhmun en chunga ruahmanna thar siam turin Principal Director, H&FW department kaihhruaina hnuaiah team din a ni.
COVID-19 hri kai, negative tawh, an negative hnu a natna dangin a tlakbuak an awm nual tawh a. An taksa peng thenkhat a lo chhiat hman avanga thi report tam tak a awm thu sawi a ni. Mizoramah pawh chin hriat a nih loh avangin post-COVID care atan hian damdawi in zawng zawng an inruahman a tul tih tarlan a ni a, ZMC-a COVID-19 hri kai enkawl dam tawh natna dang vanga inenkawl ngai leh oxygen la mamawhte enkawlna tur hmun pawh ruahman mek a nih thu sawi a ni.
He hunah hian Mizoram mipui 70% in vaccine an lak fel chuan herd immunity kan neih theih an rin thu an sawi a, hripui tun anga kan do hi chuan kan do hneh tak tak theih a rinawm loh a, ram ropui zawkte pawhin vaccination an kalpui that avangin an dinhmun a ziaawm tawh a ni an ti a. Mihring kan tlemna hi remchangah la in vaccine kan dawn kim thuai theih nan nasa lehzuala tan lak dan ngaihtuah a tha an tih thu an sawi.