Chief Minister Lalduhoma’n Hand Holding Policy in a tum ber pakhat chu entreprenuer ṭha te dap chhuaha, ding chhuak tura ṭanpui a nih thu a sawi.
Vawiin khan Chief Minister Lalduhoma chuan Zuangtui Industrial Estate-a FK Toughened Glass Factory thar leh FK Oxygen leh FK Roof, mumal taka hawng lova hun engemaw chen an lo kalpui tawh te chu a hawng a; Chief Minister chuan factory hawn tak chu ramin a mamawh tak tak thilte siamna a nih thu sawiin Tluang taka an kalpui theih nan duhsakna a hlan a, factory dang ṭha tak tak, ram dangte el phak neih belh zel tum turin a chah a ni. Lalduhoma chuan Mizoram sawrkarin Entreprenuer ṭha te a ngaihpawimawh thu sawiin Hand Holding Policy-in a tum ber pakhat chu entreprenuer ṭha te dap chhuaha, ding chhuak tura ṭanpui a ni a, ṭhalaiten he kawng hi rawn zawh uar sauh sauh se an duh thu a sawi bawk.
Factory thar hawnna inkhawm hi Vanlalsailova’n a kaihruai a, F Rodingliana, Commerce & Industry Minister, F. Kapsanga fapa chuan Industry hi hna zahawm, hlawk leh ram tana ṭha si a nih avangin hnam dangte pawhin an zah ṭhin hle ni-a sawiin Mizoram sawrkar pawhin Industry lama kan ṭhan zel theih nan nasa zawka hma lak a tum tih a sawi bawk.
Factory thar hawnnaah hian Lalbiakzama, Speaker, Lalfamkima, Deputy Speaker, Vanlalhlana, Minister, Lalrinpuii, Minister, PC Vanlalruata, Minister, Lalnghinglova Hmar, Minister of State, W. Chhuanawma, Dy. Government Chief Whip, Dr. Renu Sharma, IAS, Chief Secretary, Lalhmingliani, Secretary to Government of Mizoram leh official pawimawh eng emaw zat an tel a ni.