Vawiin khan Commissionerate of Excise & Narcotics Conference Hall ah Excise & Narcotics Department chuan ruihhlo do chungchanga kohhran thalai hruaitute nena inkawmhona an buatsaihah Lalnghinglova Hmar, Minister, Excise & Narcotics Department chuan thu sawiin ruihhlo dona chu thalaite nena kalpui ngai a nih avangin kohhran thalaite nen an inrawnkhawm dawn tih a sawi a, Sawrkarin a tihturte ringawt an sawi dawn lova kohhran thalaiah engtinnge ruihhlo an do ang tihte pawh an sawiho anga sawrkar nena thawhho dan an ngaihtuah dawn tih a sawi a.
Excise chuan Kohhran thalai tangkaina sawrkarin a hriaa, an kalpui mek member-te thatna tura ian hnathawh thin chu nasa zawka an kalpui theihnan an titiho dawn a tih sawiin Inrinniah he hun hikan buatsaih a, karleh lama Delhi a training ngai an nih vang a nih thu a sawi a, Seventh Day kohhran te hnenah thuphachawina an thlen tawh a, an thalai hruaitute nen hun remchang hmasaa inkawmhona buatsaih an remtih thu sawiin Excise Minister hian kohhrantin thalai hruaitute chu an inkhawmpuiah ruihhlo that lohzia zirtirna thu sawina hun minute sawm tal ruahmansak turin a ngen a ni.
Pu Peter Zohmingthanga, Jt. Commissioner of Excise & Narcotics chuan an department dinhmun leh hnathawh dan tlangpui a tarlang a, thawktu hi an vaiin 478 an awm mek a ni. An chhinchhiah danin kum 1984 atanga nimin thlengin mi 1811 ruihhlo vangin an thi tawh a, an zinga 1592 hi mipa an ni a, 219 te hi hmeichhia an ni. Chhinchhiah loh tam tak an la awm an ring. Nikumah bik mi 74 ruihhlo vangin an thi a, kuminah mitthi 1 an awm leh tawh a ni.