Vawiin chawhma Dar 10:00 khan Tawnluia Deputy Chief Minister hlui leh Tuichang Bialtu MLA hlui chuan Khawzawl District Hospital-ah Portable X-Ray khawl a hlan. He khawl hi Dr. Albert Lalhminghlua Medical Officer- in Dapartment aiawhin a dawng a ni. He khawl hi Pu Tawnluia’n Formasa Foundation atanga CSR fund atanga a dil chhuah niin cheng nuai 12 man a ni. X-Ray khawl hlanna inkhawm tawi buatsaih hi K.Vanlalsiama, Khawzawl Joint Village Council Chairman in a kaihruai a, Khawzawl Sub-Hqrs YMA hruaitute pawhin he hun hi an hmanpui a ni.
Tawnluia chuan Khawzawl Damdawiin hmasawnna tur pawhin theihtawp a chhuah thin thu sawiin Covid 19 avanga sawrkar sum harsatna avang erawh chuan duh anga chaka hmasawn a har thu a sawi a, Khawzawl Damdawiin chu District Hospital ah hlan kai a ni a, CMO Office tur sak zawh a ni a, khum 50 awmna tur cheng vaibelchhe 1500 ruahman fel hman a ni a, thawktu tur Post creation pawh tihfel hman niin MPSC in advertisement chhuaha an lak tura pek fel hman a nih thu a sawi a ni.
Tawnluia chuan X-Ray khawl hi Health Department-in phalnaa pek, dan ang thlapa lei a nih thu a sawi a, AERP Permission pawh tihfel tawh niin Company technician-te’n instalation an tih tur thu a sawi.
Tawnluia chuan an sawrkar chhung khan Khawzawl tan theihtawp a chhuah thin thu sawiin Khawzawlah Department thar tamtak dah thar a ni a, Khawzawl hmasawnna ka hmuh hi ka lawmna ber a ni a ti. Sawrkarna chang rih lo mah ila Khawzawl hmasawnna tura thawk tur hian ka tlanchhe ngai lovang a ti a, Khawzawlin hmasawnna hmel thar kan hmu a kan changkang ve ta hi ka lawm a, Kan rilru put hmang pawhin hma a sawn ta leh engkim kan huam a kan cho ta hi ka lawmna ber a ni a ti. Khawtlang anga kan hmasawnna kal mek, kan kalphung pangngai hi a sukuk ang tih ka hlauh ber a ni a ti bawk.
Dr. Albert Lalhminghlua, Khawzawl District Hospital Medical Officer pawhin thu sawiin thilpek lawmawm tak an dawng chu lawmawm a tih thu a sawi a, Pu Tawnluia’n Khawzawl Damdawiin a tlawh tum a an lo dil a nih thu a sawiin a lawmthu a sawi a, He X-Ray khawl hi 100 M.A a nih thu sawiin Digital-a upgrade theih a nih thu a sawi.