NGO Coordination Committee Chairman Lalhmachhuana’n engti kawng zawng mahin ramri hung leh FMR thiah chu an remti dawn lo tih a sawi.
Vawiin khan India Sorkarin Myanmar ramri hung a tum leh Free Movement Regime a tihtawp duh loh lantir nan NGO CC huaihawtin Vanapa Hall kawtah punkhawm a ni a; NGO CC Chairman, Lalhmachhuana chuan thu sawiin Zalen taka in kalpawhna ti tawp a, Mipui ngaih pawihmawhna zawng zawng dahthaa ramria India sawrkar a insawrbing chu thil pawi tak a nih thu sawiin Mizoram chin chu Engti kawng zawng mahin hung a rem dawn lo a, mihring tak pawhin a tul a nih chuan chet chhuah an inhuam niin a sawi a, hei aia nasa zawka do a tul a nih pawhin Mizo mipuite’n hruakhat vuanin an do zel dawn niin a sawi bawk.
Lalhmachhuana chuan Ramri hung leh FMR thiah a nihna chhan chu Manipur CM-in vawi tam tak an ramri hung tura a dil vangni-a a lan thu sawiin mi pakhat duh danin nge mipui duhdanin India sorkar a kal dawn tih a zawt a, mi pakhat duh dana India sorkar a kal a nih chuan khawvela democrary ram lian ber chu a awn ruai ruai tihna a ni tih sawiin chutiang a thlen lohna tura ngaihtuahna seng nawn turin Union Home Minister Pu Amit Shah leh Prime Minister Pu Narendra Modi-te a ngen a ni.
NGO CC Chairman chuan Mizoram leh Myanmar ramri hung leh FMR thiah chu rem an ti ve dawn lo tih sawiin daidaina bang siam chu khawvel kalphung a ni lo tih a sawi a, Manipur-in ramri hung duh a nih pawhin a duhte hungsak mai se, a duh lote chu hungsak lo se an duh thu sawiin Mizo mipuite chu nawr luih theihin an awm dawn lo tih a sawi a; Ruihhlo leh phal loh thil tawlhruk chu ramri hungin a hum zo tak tak chuang lo tih sawiin Bangladesh leh Paskistan ramri hung a ni chungin Chakma tam tak an lo lut tho a, hel pawl tam tak an lut reng a, engmah a dang tak tak chuang lo niin a sawi bawk.
Vawiina India Sorkarin Myanmar ramri hung a tum leh Free Movement Regime a tihtawp duh loh lantir punkhawm hi MZP President Lalthianghlima’n a kaihruai a, NGO CC Secretary Prof Malsawmliana leh Ngurmawii Sailo, MHIP Gen Hqrs President te’n thu an sawi ve bawk a ni.
Vawiina pungkhawmte hian India Sorkarin FMR a hlip leh Indo Myanmar ramri hung a tum chu tha an ti lo a, an do dal tak zet tih leh FMR tih thar leh a nih theihna tur leh ramri hung tum chu thulh a nih theihna tura NGOCC hmalakna chu an thlawp tlat tih resolution an pass a ni.