Tun hnaia social media a Champhai Police checkgate a khawchhak bungraw phur lirthei tihdin leh kaltir chungchanga thu post-ah duty officer chuan inquiry tihsak turin complaint a thehlut.
Social media a thu vawrhdarhah hian a vawrhdarhtu hian checkgate-a duty officer anga inchhalin January ni 13 zan atangin Myanmar atanga bungraw lut zawng zawng an dang a, hmelhriat nei tha lirthei 11-te chu gate sirah dingin January ni 14 tlai dar 3:00 a Home Minister hova meeting chhuah tura an tih angin an chhuah niin a sawi a, tun hmaa dan lo anga bungraw phurte chu Police nena inremsiamin an chhuah tir thin ni-a sawiin tunah chuan suspend an tawk ta hmak hmak niin a sawi bawk.
He thil thleng chungchangah hi Duty Officer chuan a tih a nih loh thu sawiin tun hnaiah Champhai Police suspend tawk an awm loh thu a sawi a, he thu vawrhdarhtu hi chhuisak turin Ningani khan inquiry neihsak turin Police department ah hian thu a thehlut a. An hmuh chhuah dan a zirin FIR thehluh a ni dawn em tih chu ngaihtuah leh a la ni dawn nia hriat a ni.
Champhai Police-te hian Chalbawiha Juction, Khankawm Police Station ah ni January 13 khan khawchhak bungraw phur lirtheite an tiding a. Heng lirtheite hian eichawp leh essential commodities dang an phur tih hriat a ni. January Ni 14 khan truck 11 chhuah lehin, hemi chungchang hi duty officer nia inchhalin a sawi chhuak a. Social media ah a tlangthang zui ta a ni.
He thu thehdarh hian khel a hlawh hle a; Home Minister nena sawizawm a nih avangin inhnialna a chawk chhuak nasa hle a, Indo-Myanmar border trade point, Zokhawthar atanga bungraw rawn lut thin thlenga sawi kai a ni.