November ni 20, 2023 khan Hmingthanzauva, Zoramchuana leh Lalremzauva Hnahlan khua ni-a insawite chu Grape zamna ban la tura insawiin Tualcheng leh Hnahlan inrina, Thangpui lui bul, Pu Khaikhanthanga thlam ah an riak a, November ni 23, 2023 (Ningani) ah grape zamna ban an la zo chu Thangpui luia inbual tura an kal chuan Sazuk ruang (tlaw) an chhar niin an insawi a, hemi zan hian Hnahlan Forest Range Officer, Staff leh Wildlife Protection Squad-te chuan an man ta a ni.
Nimin khan heng mi pathum-te hi Champhai District Chief Judicial Magistrate Pu Vanlalmuana Royte hmaah hruai niin zawhna chi hrang hrang a zawhfiah an nih hnuah PR Bond ziak tira chhuah lailawk an ni a, he Sazuk ruang hi vawin khan halral a ni ta a ni.
Sazuk halraltu Pu Lalhlupuia, Champhai District Honourary Wildlife Warden chuan ring lo mite nungchate laka an ngilneih em em lai leh, Sorkarin nungchate humhalhna dan khauh tak a kenkawh laia Mizoten Sapel leh Sava veh an la bansan thei lo chu pawi a tih thu sawiin dan palzuta ramvak thinte’n vanduaina, thihna leh piansualna thlengin an tawk tam ta hle niin a sawi a, mi tinte chu nungcha leh an chenna ramngaw humhalhtu ni theuh turin a sawm a ni.