Hrileng laka invenna damdawi, India rama siam chhuah Covaxin chu hri insiam danglam tawh B.1.617.2 do turin a chakna a hloh nasa tih a zirchiangtu scientist te chuan an tarlang a. A invenna damdawi dang ang bawkin hri do hneh theihna lamah a tlahniam.
Zirchianna hi Indian Medical Council of Medical Research (IMCR) hnuaia National Institute of Virology, Pune te chuan an nei a. Hri insiam danglam tawh B.1.617.2 (delta) do hneh tur hian UK-a hri insiam danglam (alpha) atanga chhutin a chakna chu a let hnih leh a chanve chuangin a hloh tawh tih an hmu chhuak. He zirchiannaah hian hri insiam danglam tawh leh a damdawi la tawhte thisen sample an chawhpawlh a. A natna hrik do thei, antibody insiam dan chu an enchhin a. Natna insiam danglam hmasa B1 aiin a let 2.7 in antibody chu a insiam tlem zawk.
Heti chung hian Covaxin chu Covid-19 natna insiam danglam tawh venna atan chuan a la hman tlak dawn tho a. A let thum thleng pawhin a chakna hi hloh mah se hri chu a la ngam ang, tiin scientist te chuan an sawi. He damdawi hi ICMR leh Bharat Biotech te siam chhuah niin April ni 21 khan tlangzarh a ni a. Mi 25000-a an enchhin hnuah hri do hneh thei tur hian 78% vela chak tura ngaih a ni.
Covaxin hian India-a hri insiam danglam an hmuh chhuah B.1.617.2 bakah South Africa-a an hmuh chhuah B.1.351 (Beta) te chu a la do hneh niin scientist te chuan an sawi a. Pfizer siam mRNA behchhan te, viral vector vaccine an tih mai Covishield te pawhin hri insiam danglam lakah hian an chakna chu an hloh then tho.
India-ah Covaxin leh Covishield te bakah Russia siam Sputnik V te chu a invenna damdawi atana hman a ni a. Covaxin leh Covishield ah hian Covishield chuan antibody a siam tam zawk niin GD Hospital & Diabetes Institute, Kolkata zirchianna chuan a tarlang a. Covishield hian antibody chu ni 21-36 inkarah Covaxin aiin 18.1% velin a siam tam zawk.
Sorkar chuan private damdawi inte tan a damdawi man chu Thawhlehni khan a bithliah thar a. Dose khat zelah Covishield chu Rs.780 man a ni ang a, Covaxin chu Rs.1410 niin Sputnik V chu Rs.1145 man a ni ang.