Mizorama hmeichhe naupang khuaikhemtu zingah chuan khawih ngah ber pawl a ni hial ang. H.Lalhmingmawia khan Gauhati High Court-ah chhuah a dil a, court chuan a thubuai hi chhui that leh ni rawh se tiin a relsak thung.
A thubuai chungchang hi tarlang nawn lawk ta ila. Hmeichhe naupang kum tling lo 27 te khuaikhemtu, dan tharah chuan pawngsual anga sawi theih ni bawk H.Lalhmingmawia, Saichal khua chu kum 15 chhung lung in tang turin kum 2021 August thla kha an chungthu relsak a ni a.
Lalhmingmawia hian Mizoram record duhawm lo tak mai a siam a, hursualna lam rawngkaia hmeichhe khuaikhemnaah chuan ani aia thubuai ngah an la awm lo a nih kha.
Amah hi SSA hnuaia zirtirtu a ni a, Govt. Saichal Primary School-ah thawk thinin kum 2010 atang khan pawikhawihna hi a thleng tan. A mi khawihte hi a vau a, an hlauh avangin sawi chhuak lovin an ngawihbopui ta thin a. A laka thubuai a kal hma, kum li chhung zet chu hursualna lamin a khawih thin a. A pawikhawihna hmasaah hian hremna a tawrh tak loh avangin chin zuiah a nei ta zel tihna a nih chu.
Thudawnnain a tarlan danin a pawikhawihna hi a tuartu hmeichhe thenkhatten an inkawmhonaah an sawi chhuak a, chu chu nu pakhatin a hriat hnuah thuneitute beng a thleng ta chauh a. Keipawh chutiang chuan min khawih tawh tia sawi theih an awm ta zel bawk a. FIR an ziahluh meuh chuan mi 27 te chu mipat hmeichhiatna lam rawngkai hian a lo khawih hman tawh a ni.
Khawih tihah hian khawih tak tak te pawh an awm. Dan tharah chuan pawngsual a ni thei ang tih hi a hunlaiin zawhna a tam viau a. POCSO Act hian pawngsual tih hi a huamzautir tawh viau a. In connect chauh kha a ni tawh lova. A hma chuan hei hi pawngsual anga ngaih ni chiah lo mah se POCSO Act hman a nih takah erawh chuan pawngsual a ni tawh thung a.
Mi 27 te a khuaikhem chu a lo berah dam chhunga tang turah ruat theih tak a nih laiin kum 15 chhung a tang dawn a. Hremna hi a nep nia ngaihna a awm. Hei aia hremna na zawk pe tur hian thil awmdanin a zir ta lova, Hmingmawia hi a vanneihna chin a awm a nih kha.
Kum 2012 khan naupangte hursualna laka humhimna tur leh pawikhawihtute laka hremna na zawk lekkawhna tur POCSO Act chu India ramah hman tan a ni a. Kum 2013-ah khan pawikhawihtute na zawka hremna tur Criminal law chu siamthat leh a ni bawk. Hmingmawia laka FIR an ziahluh hian a pawikhawihna hi engtika thleng chiah nge tih tarlan a awm ta lova, dan hlui leh dan thar inthial hunlai tak kha a ni a. A hun leh ni a chian loh avang hian rorelna in chuan pawikhawihtu hi chan thatna a pe lo thei ta lova, a thubuai tam zawk chu dan hlui hmanga rel a ngai ta a ni.
A pawikhawihna hi dan thar, POCSO Act hnuaiah chuan pawngsual anga puh theih deuh vek tur a nih laiin dan hluiah erawh chuan inkhuaikhemna a la ni thung a. Dan hlui anga a thubuai ngaihtuah a ngaih tak avangin hremna chu dan thar aiin a nep lo thei ta lo bawk a nih kha.
Hemi piah lamah hian mi 27 te thubuai hi chargesheet hran theuhvin thehluh a ni bawk a. FIR an ziahluh hi hun khata khung theih vek niin a laka thubuai 27 chu a rualin a kal ta a. Hei hian hremna na zawk pek a nihna chu a dal ta hlauh. A thubuai hi a ruala ngaihtuah a nih tak avangin vawikhatah a tlak vek a tul ta a ni.
A thubuai neih 27 zinga 11 ngaihtuah a ni a, a bak zawng hi dan hluiah hremna na tak pek theih ni lem lote a ni hlawm a, damchhung tang tura beisei laiin kum 15 a tang dawn a, chutah pawh chuan a aia rei zawk tan loh dan a dap a, Gauhati High Court-ah a zualko ta a.
A tanfung chu POCSO Act hmanga a chungthu an relna zinga mi hmeichhe naupang kum finfiahna atana hman baptisma certificate kha a rintlak loh. A birth certificate hi kum 2023 a tihchhuah niin, a pian kumah kum 2004 a dah a ni thung a. Chubakah chuan IPC section 376-na hmanga thubuai siamsak a nih laiin POCSO Act hmangin thiam loh chantir a ni tih te leh a judgement order-a chin pawr tur awm laite a ni.
High Court-ah hian APP lam chuan he pawikhawihtu hi hrat laklawh tawh leh chin dawklaka nei tawh, habitual offender a ni a. A laka hian thubuai engemaw zat a lut bawk a. Birth certificate dik lo tih chungchangah hian Kohhran lamin register ah an vawng tha a, a school-a luhnaa a pian kum an chhinchhiah chungchang te a tarlang ve bawk a.
Court chuan Baptisma certificate chungchangah hian a pe chhuaktute lamin tihsual an nei a. Hei hi a rorelna in hniam zawka a chungthu rel lai khan hriat chhuah a ni lova. Chubakah chuan a thubuai hi tirah Aizawla ngaihtuah a ni a, hetah hian POCSO dana section 6-na a tel lo bawk a. Mahse thiam loh chantir a nihnaah hian POCSO Act hmanga thiam loh chantir a ni thung a. Hei bakah hian Judge in hming a sign loh chungchang te nen, court hniam zawk hian tihsual a nei, tiin a sawi.
Pawikhawihna chungchangah erawh chuan pawi a khawh nge a nih tih hi finfiah a ni a, chutih rualin a chungthu relnaa dik lo tihsual leh dik lo neuh neuh awmte nen, High court chuan a chungthu hi ngaihtuah tha leh turin a relsak a.
Kum 2021-a Lalhmingmawia hremna hi court chuan a hnawl a. A laka thubuai ziahluh atangin bul an tan tha leh dawn a. Prosecution lam hi a tul a nih chuan charge sheet thehluh belh phalsak an ni a. Chu bakah chuan finfiahna dang thehluh leh witness te cross exam leh te phalsak an ni bawk a.