Congress Vice President Lalnunmawia Chuaungo chuan vawiina khan Champhai Press Club-ah thuthar thehdarhtute a kawm a, thu sawiin ZPM leader Lalduhoma chu ZNP President a nih laia Mizorama BJP-in bu an khuar theihna tura ruahmanna siampuitu-ah puhin BJP mi leh sa nen an inbiaknaah chiang takin a lang tih a sawi a, tunah pawh a rilru a la ngai reng a, BJP thawhpui tumtu an nih thu sawiin an candidate pawhin House-a a thutna lam tur a sawi chiang ngam lo a, BJP paihthlak an nih lohna tura thawhpuitute tho an nih thu a sawi bawk.
Congress Vice President chuan MNF chu NDA tel ve talh duh an nih thu sawiin “Candidate intawm siam ang u an ti a, NDA member an nihna inhnukdawk phawt ula, kan thawkho dawn nia kan ti a, NDA-a la awm reng an duh avangin kan thawhho thei ta lo a ni’ a ti a. MNF chu CAB pass puitute tho an ni a, UCC-ah pawh an ti leh tho dawn ni-a sawiin ‘MNF kan vote chuan BJP kan sawh nghet dawn tihna a ni” a ti bawk.
Lalnunmawia Chuaungo chuan India ramin MP inthlan a hmachhawn turah India ram dinhmun uluk taka thlir chunga vote thlak a ngaih thu sawiin tun sorkarah mipui zalenna nasa taka rah beh a ni a, BJP-in India ram chu Hindu lal rama siam an duh a, sakhuana bakah hnam nih phung nen lam seng luh vek an duh avangin firfiak takin a che a, Hindu tam tak pawhin BJP chu an duh lo mek niin a sawi a; MP inthlanpui lo awm turah BJP-in sorkarna an chang leh a nih phawt huan UCC an kalpui dawn tih sawiin BJP thlawp zawnga vote thlak chu Kristiante tan thil thiang a nih loh thu leh Pathian chanchintha zau zawka hrilh a nih theihna turin Congress vote ngei a ngai niin a sawi bawk.