May 1, 2024
CNA leh a thurualpui leh ZRA-EC -te chu nizan atang khan Laitui bul Chin State huam chhungah an inkap.
Maipawl thu dawnnain a sawi danin Chin National Army (CNA) leh a thurualpui CDF Tonjang, CDF Hualngoram, PDA Zomi, CDM Siyin leh CDF Mindat-te leh Zomi Revolutionary Army – Eastern Command (ZRA-EC) -te hi Chin State huam chhung Laitui khaw bulah April ni 30, Thawhlehni zan dar 11:50 vel atangin an i kap a, he inkahnaah hian CNA lam tang zingah sipai pakhat Corporal a thi a, ZRA lamah hian thi leh hliam an awm leh awm loh hriat a la ni lo.
An inkahna chhan hi sawi dan in ang lo a awm a, CDF Hualngoram Asst. Gen. Secy-in Maipawl a hrilh danin Myanmar Sipai Camp bei tura an kal chu SAC leh ZRA tangkawpin Laitui khua leh Muizawl khaw inkarah lo lambunin hmun 5 vel atangin an lo kap niin a sawi.
AGS chuan an policy in ang lo deuh mah se, Zohnahthlak ve ve inkah chu tha an tih loh thu sawiin SAC kap tura thawkchhuak an lo kap chu pawi an ti a, ZRA hian an lo kah chuan an kah let ve zel a tul tur thu a sawi bawk.
An inkahna chhan hi sawi dan dang lehah chuan an inkahna hmun hi Tiddim Township huamchhunga awm niin, ZRA-EC thuthmun a ni a; April 24, 2024 khan CNA leh a thurualpui sipai 120 velin Tiau atangin Lentlang an pan a, hei hi ZRA-EC hian anmahni bei tura ringin Mualluma mite chu an lo inralring ve nghal a ni. April 27, 2024 khan CNA mi 20 vel, sniper leh anti-aircraft nen Lentlang panin an chhuak leh a; April 30 zanlai-ah Muallum-ah chuan silai a ri ta ngei a, an inkap ta a ni. May 1 zinglam khan Muizawl atangin CNA reinforcement-in Muallum hi a pan leh niin sawi a ni bawk.
Maipawl thudawnnain a sawi danin ZRA-EC hi CNA leh a thurualpuite chuan Myanmar sipai nena inremna siam a thawkho leh thuchhuah intawm siamah an puh a, ZRA-EC chuan, “Myanmar sipai an kah loh avangin an thawhpui tihna a ni lo,’’ an ti ve thung bawk a ni.
An inkahna chhan hi sawi dan dang leh pakhatah chuan Kawlpui atang Zokhawthar-a sumdawng bungraw kal CNA-in Tiddim-ah chhiah an lo la thin a, kum hnih thum liam ta khan ZRA-EC hian an rem tih tak loh avangin an awm chhunzawm thei ta lo a, hei hi CNA hian an la na hle niin an sawi a, hei hi an inkah chhana sawi a ni bawk.