CDF Hualngoram General Secretary hnen atanga Maipawl thu dawn danin Hualngoram chhunga Myanmar sipai camp awm zawng zawngte chu CDF in an la zo tawh a, tun dinhmunah Hualngoram chhungah Myanmar sipai hmuh tur an awm tawh lo.
Hualngoram chu ram zalen a ni tih lan tirna atan nizan dar 8:00 khan India leh Myanmar in rina Tiau-a Welcome to Myanmar tih inziak chu Welcome to Chinland tiin an thlak a, Myanmar flag intar thin chu Chin National Flag an lo tar tawh bawk a ni.
Mipuiin zalenna an sual leh hnuah Hualngoram hi Chin state chhunga ram zalen hmasa ber, mipui sorkarin thuneihna an chan lehna hmasa ber a ni.
CDF Hualngoram General Secretary sawi danin Hualngoram huamchhunga rorelna chu Hualngoram Peoples Organisation (HPO) in kut ken tawh a, venhimna lam chu Chinland Defence Force (CDF) Hualngoram-in an kut ken a ni.
Tun dinhmunah Chin state huamchhung 75% chu mipui sipai kutah a awm tawh a, Khawpui pathum Halkha, Falam leh Tedim-ah chiah Myanmar sipaite an awm tawh a, heng khawpui pathumte hi mipui sipaite chuan lak ngei tumin hma an la leh dawn tih CDF Hualngoram GS chuan a sawi bawk.
CDF chuan Mizoram mipuite thlawpna leh tanpuina an dawnah lawm thu an sawi a, Mizoram sorkar, YMA leh NGO hrang hrangte leh Mizo mipuite chungah lawm thu an sawi a ni.