Chief Minister chuan an auhla ber chu Mizoramah Pathian ram lo thleng se, tih a nih thu sawiin an policy pawimawh bik pasarih zinga a hmasaberah hei hi an dah thin a, ram hmasawnna hnathawk turin sawrkar, kohhran leh tlawmngaipawlte an pawimawh thu a sawi a; BCM kohhran pawh thlarau lam rawngbawlna baka Education Concern lam te, Orphanage Home te, Ruihhlo ngai enkawlna te, Skill Development lamah te hmalakna tha tak tak an nei chu ropui a tih thu sawiin sawrkar enkawl zirna in te aia kohhran enkawl zirna in te chu kawng tam takah an that zawk fo avangin heng kohhran enkawl zirna inte thawhpuia tanpui dan tur pawh an dap chho dawn niin a sawi bawk.
Pu Lalduhoma chuan ruihhlo ngaite enkawl leh ruihhlo do thua sawrkar ruahmanna te sawiin, kohhran hrang hrangte’n thawhhona tha zawk neih theih zel tha a tih thu a sawi a, MPF awm lohna khuaah chuan MLA candidate te tan campaign-na senso a sang bik thin tih chu a tak ngeia hmuh thu a sawi bawk.
Rev. R. Lalnunzira, AGS, chuan lawmthu sawiin Baptist Church of Mizoram kohhranin sawrkar a beisei dan leh a duhsakna te a sawi a. Rorel tura lal ringawt lova, lal bawk hnathawk bawk an nih an beisei thu a tarlang. Sawrkar kal zelna turah duhsakna a hlan a ni.
Tawngtai inkhawm hi Rev R. Lalbiakliana, General Secretary, BCM in a kaihruaia, tuktin zing dar 9:30 velah hetianga tawngtai inkhawm hi an neih thin thu te, Headquarters office ah hian thawktu mi 72 vel an awm thu te a sawi. Rev. Dr. R. Lalthanmawia chuan Minister leh MLA te hi kohhran aiawhin thilpek a hlan a ni.