Rev. Chinzapauva Memorial Inter Village Football tournament chu vawiin khan final khelh niin Venglai VC team an champion.
Final-ah hian Venglai leh New Champhai an inkhel a, Inkhelh tan tangin team pahnihte game a mawiin an inbei tawk hle a, Min 12-naah Box pawn hretah Venglaiin Free kick an hmu a, K Lalremmuana’n petin goal kilah mawi zetin a lut a, New Champhai keeper VL-a a che hman lo. Venglaiin goal khung belhna hun tha neiin goal line bul atangin Mampuia’n tha taka pet chhuakin New Champhai a chhanhim. Min 18-naah New Champhaiin Yard 40 vela hlaah Free kick an hmu a, Dead ball pet thiam bik Ephraim-a’n petin lei hrulah mawi takin goal-ah a lut a, New Champhai siphurh a sut. Venglaiin hma hruai theihna hun tha K Lalremmuana hmangin an nei a, VL-a’n tha takin a dan sak, Ist half-ah goal dang a luh belh lo.
Min 52-naah Venglaiin Corner Kick an hmu a, K Lalruatdika’n petin New Champhai defender-in a tauh pial a, Lalhmingthanga Sailo hmaah tak ball chhuakin chiang takin a tauh goal a, Venglai hma a hruaipui. Min 67-naah New Champhaiin an siphurh sut theihna hun tha nei mah se, Danmawia tauh Sangzuala’n tha takin a save sak. Minn 80-naah Venglaiin Free kick an hmu a, he mi kal zelah New Champhai Defender-te’n ball an pet chhuah tha tawk loh chu Lalchhanhima Sailo hmaah tak chhuakin Venglai goal 3-na a khung. Min 83-naah Lalchhanhima Sailo-in dinglam sir atanga ball la lutin defender pahnih a tlan pelh hnuah H Lalrinpuia tan a pe a, H Lalrinpuia hian mawi taka goal-ah pet lutin Venglai goal 4-na a khung a, hun tawp thlenga goal dang luh belh loin Venglaiin 4-1 a hnehna changin veng leh veng inelnaah a vawikhatna atan an Champion ta a ni. He inkhelah hian Zonunmawia, New Champhai chu man of the Match-ah thlan a ni.
Champion : Venglai
Runners : New Champhai
Fair Play : New Champhai
Mimal lawmman
Gatorade Best Player – K Lalremmuana, Venglai
Gatorade Top Scorer – C Lalremruata, Vengthlang North (10 goals)
Gatorade Best goal keeper – Lalsangzuala, Venglai
Gatorade Best defender – Lalchhuanmawia, Venglai
Gatorade Best midfielder – F Vanlalchhanchhuaha, Venglai
Gatorade Best forward – Lalchhanhima Sailo, Venglai
Gatorade Best Promising player – F Malsawmdawngpuia, New Champhai
Gatorade Best Coach – Lalnaua, Venglai
Gatorade Best Referee – Rosiamliana