CMO Champhai, National Health Mission chuan tun hnaia Pneumonia avanga Champhai District chhunga naupang thi tam lutuk ti ziaawm turin beihpui an thlak.
CMO Office buatsaihin District Hospital OPD-ah Awareness Campaign an buatsaih tawh a, tunah hian khaw tinah Health Worker leh Asha te chuan screening an nei bawk a, tun thla tawpah hei hi zawh hman beisei a ni.
CMO Office Champhaia thawktute chuan Pneumonia hi hmuh chhuah vat a nih a, enkawlna an dawn nghal chuan an dam tlangpui a, in lama inenkawl hrep tawh hnua Damdawi in panpui leh chauhte zingah thihna chance a sang bik niin an sawi.
Champhai District Routine Immunization Nodal Officer Dr RE Lalremruata chuan Maipawl zawhna chhangin Pneumonia hri danna ni kum 2022 atangin pek chhuah tawh niin danna hi Health Sub Centre leh Healh & Wellness Centre-ah lak theih reng a nih thu a sawi a, naupang thla khat leh a chanve an tlin atanga pek tan thin an nih thu a sawi bawk.
Kumin chhungin Champhai district Hospital-an naupang dam lo 1161 dah luh tawh niin an zinga 700 (Za zela 60.29)-te chu Pneumonia vei an ni a, Pneumonia avanga naupang thi hi mi 16 an awm tling tawh a ni. Champhai District Hospital-a naupang doctor chuan Pneumonia vei an tam lutuk chu engnge a chhan hriat a har thu sawiin Hospital panpui loh Pneumonia eng emaw zat an awm a rin thu sawiin, hun rei tak mahni in lama inenkawl hnua damdawi in pan chauh eng emaw zat an awm thu a sawi a, Pneumonia vei zinga a tam zawk chu kum 5 hnuai lam an nih thu a sawi bawk.