June 6, 2024 : Champhai Police hian tukkin dar 8:00 vel khan Champhai Police Check gate, Chalbawiha Junction paltlang tur Zokhawthar atanga Aizawl pan Car pakhat an endik a, Car kawng khar chhunga thuhruk Heroin Hawng 156, Kg 1 leh Gram 902 an hmu chhuak a, a neitua puh Car khalhtu Lalnunpuia Khawlhring, Zokhawthar khua ni-a insawi chu manin ND&PS Act hmanga thubuai siamsak nghal a ni a, ruihhlo phurhna atana hman Car hi hren a ni a, ruihhlo tawlhnaa inhnam hnawih dangte Police-te hian an chhui zui nghal a, a neitua puh hi thu zawhfiah turin Court-ah darkar 72 chhung kawl chhunzawm an dil a ni.
Champhai Police-te Heroin man rih zawng hi a hlawma ruihhlo tawlhna Commercial Quantity a tling phak a, a neitua puh hi Court-in thiam loh a chantir a nih chuan Kum 10 atanga kum 20 chhung Lung in tang tur leh pawisa chawi tura hrem theih a ni.
Tun hnaiah Heroin tawlh hi a hluar hle a, thla liam ta May thla chhunga Champhai Police Station-a thubuai 32 ziah luh zinga tam ber chu ND&PS Act hnuaia ziah luh a ni a, ND&PS Act hnuaiah hiaan thubuai 18 ziah luh niin thla khat chhunga thubuai ziah luh zinga za zela 56.25 a ni. May thla chhung khan Heroin Kg 4 leh Gram 307 a rit a man a; Methaphetamine Kg 22 leh Gram 35 an man bawk a ni. Heng ruihhlo an man zinga tum 5 hi ruihhlo a hlawma tawlhna Commercial Quantity tling phak a ni a, Kg 1 chuang tum 2 man niin Gram 250 chhuang tum 3 man a ni bawk.
May thla chhung hian Champhai Police Station-ah Rukruk thubuai 6 ziah luh a ni a, Hursualna lam hawi zawnga inkhawih thubuai leh Kut inthlak thubuai 2 ve ve, hursualna lam hawi zawnga naupang kum tling lo khawih thubuai, Invauna thubuai, Jail tang tlanchhuak leh IT Act hnuaiah thubuai 1 theuh ziah luh a ni a, Jail tang tlan chhuak hi man leh tawh a ni.