Health & Family Welfare Dept changtu Minister Lalrinpuii’n Champhai District Hospital tihchangtlunna turin project lian pahnih kal lai a awm thu House a hrilh.
Vawiina Assembly House-a Champhai South bialtu MLA Lt. Col. Clement Lalhmingthanga’n Champhai district Hospital tihchangtlun chungchang a zawhna chu Healh & Family Welfare Dept changtu Minister Lalrinpuii chuan chhangin Champhai District Hospital tihchangtlunna tur project lian pahnih kal lai a awm thu sawiin Pradhan Mantri Ayushman Bharath Health Infrastructure Mission PM-ABHIM hnuaiah laboratory phuisui zawk IPHL -integrated Public Healh Laboratory sak mek niin khawl leh bungraw dang pawh dah tura ruahman a ni a, Emergency Covid Response Package (ECRP 2) hnuaiah Crictical Care Block (CCB) te, Intensive Care Unit (ICU) leh High Dependency Unit (HDU) awmna tur pawh sak mek a nih thu a sawi bawk.
Health Minister chuan Specialist leh doctor indaih lohna phuhrukna turin hmalak mek a nih thu sawiin Champhai District Hospitala Trauma centre din tawh chu thawktu neih loh avangin a la function lo a, Trauma centre hi a function vat theihna turin sorkar laipuiah an dil mek niin a sawi a; Zawhbelhna chhangin Lalrinpuii chuan specialist post hnawhkhat turin MPSC-ah hnalak kalpui mek niin Ayush doctor 5 lak thar niin offer of appointment pek a ni a, GDMO post 9 hnawhkhat turin MPSC-ah an thawn tawh a, recruitment kalpui theih thuai beisei a ni a, Specialist post 3, GDMO post 1 leh Dental Surgeon post 1 hnawhkhat turin DP&AR ah phalna an dil mek niin a sawi bawk.
H Ginzalala, Champhai North bialtu MLA-in Healh Care atana ADB loan an buaipui tawh sorkar tharin a chhunzawm dawn em tih a zawhna chu chhangin Healh & Family Welfare Dept changtu Minister Lalrinpuii chuan ADB loan chungchanga Sorkar hmasa hmalakna fakawm a tih thu sawiin corpus fund atan ADB loan cheng Vbch 1000 an lo be fel vek tawh tih sawiin bawhzui reng a ni a, inthlanpui hmachhawn dawn avangin June thla velah inremna ziak turin an intifel niin a sawi bawk.
Ramthanmawia, East Tuipui bialtu MLA-in a bial chhung Sesih PHC-ah tun dinhmunah IV Grade pakhat chiah thawktu a awm thu sawiin damdawi in khar hial ngai tur dinhmunah an awm mek tih sawiin thawktu dah belh theih a ni ang em? tih a zawhna chu chhangin Health Minister chuan Sesih PHC-a IV Grade pakhat chauh awm chu pawi a tih thu sawiin Pathian khawngaihna a zarah thawktu an neih ve thuai a beisei thu a sawi a; Lalrinpuii chuan S Vanlaiphai damdawi in (PHC), khum 10 awm thin, sak that mek chu February thla khan an tlawh a, khum 10 awmna turah khum ruk chauh a leng a, a buaithlak a, a tlin loh lutuk avangin a chep a, ngaihtuahna thar seng a, building hlui la tha tho chei thar dan a awm chuan, khum dang pali dah theih turin ngaihtuahna seng turin a ti niin a sawi bawk