June 29, 2024 : Central Jail, Aizawla tang mek mi 4, nimina jail tang motor atanga tlan chhuakte chu vawiin thleng khan man an la ni lo a, ngawrh taka zawn mek an ni.
Aizawl SP, Rahul Alwal chuan, Central Jail-a tangte an tlanchhuah chungchangah hian Vaivakawn Police Station-ah thubuai ziah luh a nih thu a sawi a. Tang tlanchhuakte hi Police ten ngawrh takin an zawng mek a, tlawmngai pawl hrang hrangte chu lo ngaihvenpui tura ngen niin, hmun hrang hrangah an chanchin ngaihven a nih thu a sawi.
Central Jail, Aizawla tang mek mi 4 – Daniel Laljathang Baite, kum 29; Augustine Seikholal Haokhip, kum 23; Paoboi Singson, kum 33; Genkhopao Haokip, kum 24 te chu nimin tlai dar 3:30 vel khan Zonuam Veng huam chhung atangin an tlan chhuak a. An pali hian Manipur mi vek niin, ruihhlo kaihhnawih vanga man an ni a. Nimin khan an thubuai ngaihtuah turin Aizawl District Court-ah hruai an ni a, Court atanga Central Jail panpui an nih laiin, Zonuam Veng huam chhungah prison van tukverh tichhiain an tlan chhuak ni-a hriat a ni.