CDFA Cup hi Champhai District Football Association hnuaia Ist Div Club-te tana buatsaih niin Ist Div club 6-te an inkhelh kual hnua point hmu sang pahnih Bethel FC leh Kanan FC an inhmachhawn a ni.
Kanan FC hian vawi 5 khelhah point 12 hmuin Table chung berah an awm a, Bethel FC lakah an tlawm tih loh chu hneh loh an nei lo.
Bethel FC hi chak loh nei lo awm chhun niin TMFC Melbuk leh Vengthar FC an inhnehtawkpui thung a, Point 11 hmu-in Table-ah pahnihnaah an awm.
Final inkhelah hian goal a lut har hle a, Team pahnihte’n Ist Half-ah goal khung theihna hun tha an neihte an hmang tangkai thei lo a; 2nd Half Min 55-naah goal hmasa ber lutin C Ngurnuntluanga’n Bethel FC tan a ti-goal a, Kanan lamin an siphurh sut tum viau mah se, Min 70-naah Lalruatfela’n an lamah a ti goal palh a, hun tawp thlenga goal dang luh belh lo-in Bethel FC hian si 2 faia hnehna changin an champion ta a ni.
Bethel FC Player Jessie Lalmawizuala chu Best Player a ni a, goal 16 khungtu Lalnunsanga, Kanan FC chu top scorer niin Kanan FC -in Fair Play Award an dawng a ni.
CDFA Cup 2024-a point hmu tlem ber New Champhai FC chu 2nd Div lamah a tla thla a, 2nd Div Tournament khelh zawh taka Champion Kahrawt FC chu Ist Div-ah an kai thung a, CDFA Cup-a point hmu tlem ber dawt Vengthar FC leh 2nd Div tournament runner up SMFC Khuanglengin Play off khelin Vengthar FC hian hnehna changin Ist Div-ah an la awm chhunzawm dawn bawk a ni