July 25, 2024: Indo-Myanmar border trade point, Zokhawthar katlanga bungraw lut leh chhuak-te chu vawiin atang khan tihtawp a ni.
Vawiin atangin Zokhawthar kaltlanga Myanmar atanga sumdawng bungraw rawn lut leh Mizoram lam atanga thawnchhuahte chu dan tan a ni a, Ramri kaltlang tlang hian dan lo a bungraw lutte chu nitin mipui mamawhte a nih avangin inhriatthiam tawnna hmanga kai tir thin a ni a; vawiin atang erawh chuan inhriattiamna hmanga bungraw kai zawng zawngte hi tihtawp vek a ni dawn a, dan anga bungraw kai thei bill of entry neite erawh chu an dang dawn lo thung a ni.
Tarlan tawh angin Tuna bungrua veivak zawng zawng tihtawp a ni tur hi tun hnaia Gauhati High Court-in kuhva rah ro tawlhna, CBI chhuitir tura a tih nghawng pakhat nia hriat a ni. Bungraw lut leh chhuak tur dan hun chhung tur hi hriat a ni rih lo a, Zokhawthar mai bakah Ramri kai dangah pawh bungraw lut tur dang hian Custom Preventive Force hi an duty dawn ni-a thu dawn a ni.
Bungraw lut leh chhuak tur tihtawp tur chungchangah Social Media lama CBI-te Zokhawthar an kal dawn vang ni-a tarlan chu a sawitu ni-a sawi Custom Preventive Force chuan an sawi a nih loh thu an sawi a, CBI rawn kal tur hi an hriat bik loh thu leh an rawn kal hun tur pawh an hriat loh thu an sawi.
Bungraw lut leh chhuak tur tihtawp a nih chhan hi Custom Preventive Forc chuan tarlang lo mah se, hmunpui lam atanga an thudawn bawhzuina tur ni-a sawi a ni a, mihring veivak erawh chu khuahkhirh a ni dawn lo tih Maipawl thudawnna chuan a sawi.
Zokhawthar khawtlang hruaitute’n Maipawl an hrilh danin Zokhawthat mipui tam ber chu ram pahnih insumdawn tawnna beh chhana eizawng an ni a, ni khat lek pawh bungrua a kai lo a nih chuan inhlawhna nei lo mi eng emaw zat an awm a, engtia rei nge bungraw lut leh chhuak hi dan a nih dawn tih hriat a nih loh avangin Zokhawthar mipui tam zawkte eizawnna chu a tawp nghal dawn tih sawiin bungraw kai tihtawp chu tha an tih loh thu an sawi.
Myanmar bungrua nitin mamawh rawn lutte hi a tam ber chu Zokhawthar kaltlanga rawn phurh luh hi a ni a, hetia bungraw lut leh chhuak dan a nih chuan Myanmar bungrua Mizoram chhekkhawl sa te chu a man a to chak hle tura ngaih a ni.