Mizoram Rural Bank hman theih loh chhan chu cyber attack chi khat ransomware attack vang nia hriat a ni.
Mizoram Rural Bank-a account neite chuan vawiin lamah UPI an hman theih loh thu an sawi a. Hemi chungchangah hian MRB chuan thuchhuah siamin, India ram chhunga Regional Rural Bank 14 leh Cooperative bank thenkhat chuan NPCI Retail Payment/Digital Service (UPI hmanna – GPay, PayTM, PhonePe, IMPS leh a dangte)-ah harsatna hun eng emaw chen an tawk tih tarlangin, hemi harsatna hi heng bank hrang hrangte Service Provider, C-Edge Techologies Ltd.-in buaina an tawh avang a ni, an ti a, he buaina hian an enkawl bank-te tawrhna a thlen lohna turin Retail Payment service-te hi NPCI chuan a titawp rih a ni.
NPCI hi India rama retail payment (UPI – PayTM, Gpay, PhonePe, BHIM leh a dangte) enkawltu leh thuneitu a ni a. Nimina NPCI leh C-Edge Techologies Ltd. te’n thuchhuah an siamah harsatna chu a rang thei ang bera chingfel tura hma an lak thu an sawi a.
NPCI leh C-Edge Technology te hian cyberattack chi khat ransomware attack an tawh vang niin news agency te chuan an tarlang a. Ransomware hmanga beihna avangin India rama local bank tenau 300-vela pawisa pekna system chu a khaihlak tih an sawi a. He pawikhawihna hian ram puma bank tenaute hnena banking technology system pe thin C-Edge technologies a nghawng niin an sawi bawk.
National Payment corporation of India (NCPI) chuan C-Edge-in a service pek bank-a customer-te chuan isolation hun chhung hian pawisa pekna system an hmang thei dawn lo tih an sawi a, he pawikhawihna hi a darh loh nan audit an nei mek ni-a sawi a ni a; RBI leh India cyber thuneitute chuan kar engmawzat kalta chhung khan India bank-te chu beihna awm thin chungchang an vaukhan tawh niin banking industry thuchhuah chuan a tarlang bawk.
Ransomware attack avanga bank buai hi thingtlang lama mi deuh vek an ni a. Khawpui lian (Urban) in an tuar lova, pawisa chetvelnaah 0.5% vel a tibuai tura chhut a ni.
Ransomware hi computer software hmanga inbeihna a ni a, computer system leh data te khawih theih lohva hrengin, a beitu misualte chuan pawisa an phut a. Tam takah chuan data te hi tlangzarhah te an vau thin bawk a. Kum 2017 chhovah khan WannaCry ransomware attack chuan khawthlang ramte a lo tibuai hle tawh a. Ram 150-ah computer nuai 3 vel beiin, chhiatna an thlen hi dollar tluklehdingawn tel ni tura chhut a ni.