Joel Lalramdinmawia, Lalchhuanliana fapa Champhai Electric Veng leh Zoramthari, Lalthlekchuailova fanu Champhai Vengthlang te chu Pullela Gopichand Badminton Academy, Hyderabad-a badminton coaching chhunzawm tura thlan an ni a; Anni pahnih hi Pullela Gopichand Intensive Training Centre (PGITC), Aizawl a badminton coaching kal mek an nii a, TATA Trusts (NEIDA), PGBA leh MBA te thawh hona thar hnuai a PGBA a full time training nei tura thlan thar hmasak ber te an ni.
Zoramthari hi kum 13 mi niin tun hnaia All India Sub-junior Badminton Ranking Tournament, Bangalore a neih zawh takah khan Under-15 Mixed Doubles category-ah semi final a thleng a. He tournament-ah vek hian Girl’s singles category-ah pre-quarter final a thleng bawk. Joel-a hi kum 14 mi niin Badminton Club Republic tana khel mek a ni a, hmabak eng tak nei, player tha bik a ni.
Mizo naupang ten badminton game ah hma an sawn nasa in, India rama a thiam ber ber an ni chho thei hi a ropui kan ti tak zet a. Mizoram leh India ram ti hmingthatu ni zel tur in duhsakna sang ber Mizoram Badminton Association chuan a hlan a ni.