Nimina Siaha District-a Laki khuaa Assam Rifles kuta inpe Myanmar Sipai 30 te chu vawiin khan Tuipang atangin thawn let an ni.
Myanmar Sipaite chu tukin dar 9:30 Tuipang Helipad atangin India chuan Myanmar-ah a thawn kir a, Helicop-te hian Myanmar sipaite hi tum 2 a thiar a, dar 10:30 khan Tuipang hi an chhuahsan fel a ni. Sipaite hi Moreh panpui niin Moreh atangin Tamu panpui an niin thu dawn a ni.
Myanmar sipaite hi nimin zing khan Siaha District-a Laki khuaa Assam Rifles awmnaah Burma sipai 30 te chu an ralthuam thahnem tak nen an inpe. Heng sipai inpete hi Lailenpi, Chin State, Siaha District atanga hla vak lova awmte nia hriat a ni. Lailenpi-a sipai hmun hi CNA kaihhruainain mipui sipaite chuan an bei a, sipai lamah hian thi leh hliam an awm em tih hriatchian a ni lova, mipui sipai lamah mi pahnih an thi ni-a hriat a ni.
Chin State-a inkahna thleng avangin tun hi India rama Burma sipai an inpek tum thumna a ni a, hemi hma hian champhai District-a Zokhawthar leh Vaphai ahte an lo inpe tawh bawk a ni. Mipui sipaite hian Chin State za zela 75 vel an thunun tawh niin sawi a ni a, sipai awmna beiin ram an lakbelh zel a ni.