Assam Rifles te chuan Zokhawthara India leh Myanmar inkalpawhnaa mihring kaltlangna chu khauh zawkin an kalpui.
Zokhawthar atanga thudawn danin nimin atang khan helai ramria Assam Rifles duty te chuan lut leh chhuak tur reng rengah document an phut a. India atanga Myanmar lama lut tur hian Champhai district-a aadhaar card leh document dang nei lo chu tlang an phal lova. Myanmar atanga India lama rawn lut turin anmahni thuneitute hriatpuina lehkha rawn keng lo chu gate paltlang an phal lo bawk.
Zokhawthar VCP chuan Assam Rifles-in tuna khauh zawka mihring veivak an khuahkhirhna hi Home Ministry atanga December thlaa instruction an dawn tawh tiin an sawi niin Maipawl an hrilh a. Assam Rifles lam hian an thudawn hi ziakin khawtlang hruaitute hnenah an hmuh lem lo nia hriat a ni.
Myanmar lamah hian Mizo hnam ziaranga hmun pawimawh Rihdil leh Buannel te chu tun chawlh vuakvetah Mizoram lam atangin tlawhtu an thahnem hle a. Tuna Assam Rifles te hmalakna avang hian district dang atanga Champhaia zin, Rihdil tlawh tum zingah harsatna tawk an awm niin Maipawl chuan thu a dawng.