An pafa-a hmeichhe naupang kum tling lo pawngsual thintua puhte Champhai Police-in an man.
Champhai District chhung khaw pakhata hmeichhe naupang kum 15 mi chu an khuaa Saitawna kum 53 mi leh a fapa Vanlalmawia kum 23-te’n an pawngsual thin a, hmeichhe naupang sawi danin kum 4 mi vel a nih laiin Saitawna hian a serh a khawihsak thin a, Kum 9 mi a nih laiin Vanlalmawia hian a pawngsual niin a sawi a, hemi hnu atang hian an pafa hian an pawngsual thin niin a sawi bawk.
He pawikhawihna hriat chhuah a nih dan hi Hmeichhe naupang kum tling lote sikul luhnaa an zirtirtunu chuan a zirlai naupangte chu an thil tawn tawh leh an chunga thil thleng mi dang an la hrilh ngai miah loh a hnena sawi duh an neih chuan paper-a ziakin a hnena thehlut turin a zirlaite a ti a.
Hetah hian he hmeichhe naupang hian a chunga thil thleng rapthlak tak, a thisen zawmpui, a nu leh pa leh a chhungte tak ngial pawh a la hrilh ngai loh, amah chauhin hrehawm ti taka a lo tuar tlawk tlawk tawh chu sawina hun rem chang a nei ta niin a inhria a, a rilru ti tawt em em tu, a nun ti hrehawm ngawih ngawihtu puan chhuahna hun rangkha chak a neih chu bawh pelh a tum lo.
Kum 4 mi leh a nih laia an thenawmpa-in a serh a khawihsak dan te, a hnu a, a fapa-in a pawngsual tak dan te, a hnua an pafa-a an mipat hmeichhiatna an hmanpui dante chu paper-ah zep nei miah lo in a ziak ta a ni.
An Miss chuan uluk takin a zirlai naupangte’n ring tawk taka an chanchin an hrilh chu a zir chiang a, Hmeichhe naupang pakhat thu ziah chuan a thawng hle mai a, hmeichhe naupang chu uluk takin zawhna a zawt a, dawt a ziakin a ring lo.
An Miss chuan engtin nge hmeichhe naupang chunga rapthlak taka che thin pafate chu hremna pek an nih ang tih a ngaihtuah a, a rilru a buai hle mai a, an bialtu pastor hrilhin hmeichhe naupang chhungte nen hmalak dan tur an ngaihtuah ho ta a.
Hmeichhe naupang chuan a hmalam ngun takin a ngaihtuah a, pawl 10 exam mai tur a nih avangin he thubuai hi la irh chhua rih lo se a duh avangin he a chunga thil thleng chungchangah hian hma la rih lo se, Pawl 10 exam hma chhawn phawt a duh avangin he thil thleng hi la up leh rih a ni.
Pawl 10 an exam zawh hnuah chuan hmeichhe naupang pa chuan Champhai Police Station-ah kalin a fanu chunga thil rapthlak tak thleng chu chhui chiansak turin FIR a theh lut ta a ni.
Hmeichhe naupang kum tlinglo pawngsual thintua puh Saitawna leh a fapa te hi Champhai Police-te chuan man nghalin Lung inah an khung a, Court-in he thubuai hi a ngaihtuah mek a ni.
Hei bakah hian Champhai khawpui chhung veng pakhata hmeichhe naupang kum 13 mi, a chhungte-ina awm chu a awmna te mikhualin zanlaiah a room-a kalin a serh a khawihsak ni-a sawiin a putea’n Champhai Police station-ah FIR a theh lut a, hursualna lam hawi zawnga hmeichhe naupang kum tling lo khawihtua puh Laltlansanga Lunglei Chandmari veng ni-a insawi chu Champhai Police-in an man bawk a ni.