- Nimin khan Aizawl Municipal Corporation chuan Durtlang Road a insa lai mi 8 hnenah lehkha a pe hlawm a. Chung zinga pathum chu an in hmun laih chungchang a ni a. Mi 5 hnenah “insawifiah tura tihna” (Show couse notice) pek niin, an zinga pahnih phei hi chu nikum lama insawifiah tura lo tih tawh, an insawifiah loh vanga lehkha pek nawn lehna a ni. Nimina thuchhuah zinga pakhat phei chu a insak hi arang thei ang bera ṭhiahsak a nih tur thu a ni.
Lehkha tihchhuah zingah hian Pu Lalramsanga, Bawngkawn veng in sak hi insak phallohna hmun leh AMC aṭanga phalna nei lo a sa anih thu nikum July ni 12 khan lehkha pek a ni a, insawifiah tura tih a ni. Pu Lalramsanga insawifiahna hi AMC chuan a pawm lo a. Aug ni 4, 2023 khan lehkha pe lehin, ṭhiah a nih lohna chhan tur sawifiah tura tihna lehkha pek ni lehin, October ni 25, 2023 khan lehkha pek nawn leh a ni. Pu Lalramsanga hian lehkha te hi a chhan loh avangin AMC chuan Section 137 na, Mizoram Municipalities Act, 2007 (2015 a siamṭhat) tlawhchhanin ṭhiahsak tur thu a chhuah ta a ni. Pu Lalramsanga In hi a rang thei ang bera ṭhiah tur niin, March ni 29, 2024 hmain ṭhiah zawh tur a ni.
Insawifiah tura tih zinga Pu Sawilaia, Bawngkawn Shalom Veng, Pu Lalramthanga, Bawngkawn leh Pi Zohmingliani, Chanmari Veng te hi an insakna hmun hi Mizoram Municipalities Act-2007 (2015 a siamthat) Chapter XII (135 & 137) insak phallohna hmun a nih avang leh heng danin a sawi tlawhchhana ṭhiah a nih lohna chhan tur lehkha an hmuh aṭanga ni 15 chhunga insawifiah tura tihna lehkha te a ni.
Insawifiah tura tih zinga Pu Lalropuia, Vanapa Section, Bawngkawn leh Pu Lalremsiama, Ramhlun South te chu an in sakna hmun hi insak phallohna hmun a nih avangin nikum Aug ni 4 khan insawifiah tura tih an lo ni tawh a, engmah insawifiahna an la neih loh avang leh lehkha an hmuh aṭang ni 15 chhunga an insawifiah lo a nih chuan Mizoram Municipalities Act-2007 (2015 a siamthat) in a sawi anga hmalak a nih tur thu hriattirna a ni.
Lehkha pek zinga Pi Hmingthanzuali, Chaltlang leh Pi H Zodinsangi, Zotlang te chu an lei laih mek chungchangah an lei laih hian kawngpui a ti bal tur a ni lo a, phiatfai zel tura hriattirin, an lei laih chuan Motor leh mihring veivak a tibuai tur a ni lo tih hriattir an ni.
Lehkha pek zinga Pu Lalhruaisanga, Lawngtlai chu in sakna tur a laih mekah in sak phalna a dilna drawing siam ṭhaa thehlut tura tih a ni tawh a, a la thehluh loh avangin lehkha ahmuh aṭanga ni 15 chhunga thehlut tura hriattirna a ni.