MNF Party Lok Sabha MP Candidate K Vanlalvena’n NDA a zawm avanga Kristianna phatsana puhna chu inbumna mai mai a nih thu a sawi.
Vawiin khan K Vanlalvena hian Champhai Press Club-ah chanchinbumite kawmin he thu hi a sawi a, K Vanlalvena chuan Lok Sabha MP-a thlan tlin a nih chuan ‘Pathian leh kan ram tan’ titute an nih angin Parliament pawn a ni emaw a chhungah a ni emaw ram, hnam leh Kristian sakhua humhim turin theihtawp a chhuahzel dawn tih a sawi a. Kristiante humhim bik ni-a insawi a, NDA-a a thut avanga Kristianna phatsana anga an puhna chu inbumna mai mai a nih thu sawiin NDA leh INDIA in epnaah Kristian MP tlemte an awm ve a, NDA atangin chhuak vek se la chuan BJP chu Hindu ni lo sakhaw dang nekchep zawngin an active em em a, Hindu hlangin ro an rel ang a, an duh ang zawng zawng an puitlin vek dawn avangin an kal zel tur dodal turin an zingah an awm reng ve a ngai niin a sawi.
K Vanlalvena chuan chanchinbumite zawhna chhangin Hnam leh sakhaw tana him lo a awm a nih chuan an do dal ang a, an dodalna in awmzia a nei lo a nih chuan engtik lai pawhin NDA chhuahsan an inpeih reng niin a sawi a, Zofate insuihkhawma rorelna pakhat hnuaia awm chu politics-a a tum leh a thlakhlelh ber a nih thu a sawi bawk.
K Vanlalvena chuan hnam tenaute humhalh turin at a tul huna at deuh bat nei MP parliament-ah an thut zel a ngai tih sawiin Kristianna vawng himtu ni-a insawi party MP-te an ngawih thup laiin House-ah hnam leh sakhaw humhim turin amah chiah a tlangau niin a sawi a. Kristianna humhalh tur te, hnam tenaute humhal turin tun aia nasain a tlangau zel dawn tih sawiin chutianga ram leh hnam, sakhaw humhim tura hma a lak theihna tura hun tha a neih theihna turin mipuite chu an vote hlu tak pe turin a sawm a ni.
K Vanlalvena hi Lalchhandama Ralte MLA leh MNF Adviser TJ Lalnuntluanga leh Dr. ZR Thiamsanga te’n an tawiawm a ni.