Judicial Magistrate First Class, District Court, Champhai chuan Dungtlang khuaa nu pakhat, hriamhrei hmanga a fapa, thla 10 mi, na taka kutthlaktu bail dilna chu a hnawl.
Child Welfare Committee, Champhai Member pakhatin FIR a thehluh bawhzuiin Dungtlang khua a nu pakhat chu kumin March ni 5 khan , a fapa thla 10 mi hriamhrei hmanga na taka kutthlak thubuai leh naupang kum tlinglo a enkawltu in a ngaihthah leh nghaisak thubuaiah man a ni a. Lungin ah khung nghal a ni.
Judicial Magistrate chuan pawikhawihtuin bail a dilna chungchang hi ngaihtuahin a pawikhawih hremna nat dan leh a pawikhawih ziarang te, pawikhawihtu chu chhuah a nih chuan tlanbo leh pawi khawih leh mai thei leh a chet dan chu a chhungte tan pawh himlo a nih avang te leh thubuai chu chhui lai, chargesheet la thehluh loh a nih avangin thubuai chhuina te a tihbuai theih vang te in bail hi hnawl niin a tarlang.
Pawikhawihtu hi Sec 118 (2) BNS hnuaiah hriamhrei hlauhawm hmang a na taka mi kutthlak thubuai siamsak a ni a. Kum 10 thleng lungin tan theih a ni a. Hei bakah hian Section 75 Juvenile Justice Act hnuaiah naupang kumtlinglo enkawltuin a naupang enkawl lai ngaihthah leh kutthlak thubuai siamsak a ni bawk. He thubuai vang hian kum 3 thleng lungin tan leh cheng nuai 10 thleng chawi theih a ni bawk.
Juvenile Justice Act hnuaiah naupang te nihna tarlan phalloh a nih avangin pawikhawihtu nihna tarlan hian naupang nihna a tarlan tel theih vangin pawikhawihtu hming leh nihna te hi tarlan loh a ni.