Hnahthial-a hun hmang mek Jeje Lalpekhlua, South Tuipui bialtu MLA chuan vawiin khan District Urban Development Officer, P&E Sub Divisional Officer, District Hospital Hnahthial leh UD&PA in District Hospital bula damlo awmpuitute awmna tur an sak mek Patient Attendent Shelter a tlawh.
Office a tlawhnaah hian DUDO Ngen Thianlala, SDO Sadar chuan lo dawngsawngin UD&PA in an hmalakna scheme hrang hrangte a hrilhfiah a, hmachhawp an neih-ah te tanpui an ngaihna zawna puih a inhuam thu Jeje Lalpekhlua hian a sawi a ni.
P&E a tlawhnaah hian B. Lalchhanhima, SDO chuan lo dawngsawngin thilpek atan Bible a lo hlan a, Hnahthial in Power Supply a lakluhna line te, tuna buaipui mek 123kV Sub Station chungchang bakah staff dinhmun leh indaih lohnate an lo hrilhfiah a, MLA chuan theih tawp chhuaha hma lakpui a tum thu a hrilh a ni.
District Hospital Hnahthial-ah Dr. Lalrengpuii Ralte CMO leh a thawhpui ten lo dawng sawngin Jejea chuan hriselna a ngaih pawimawh thu leh a hmasa bera a dah thin thu sawiin, Damdawi in thawktuten theih tawp chhuaha hna an thawh tawhnaah lawmthu hrilhin theih tawp chhuah chhunzawm zel tur a sawmin, an mamawh leh harsatna an thlente ngaihtuahpui a tum thu a hrilh bawk.
Jeje Lalpekhlua hian football a khelh laiin District Hospital Hnahthial tan hian Water Cooler a pek bakah cabin ‘Jeje’s Cabin’ a siam sak bawk a, Water Cooler pawh tangkai taka an hman reng thu leh a cabin siam atang hian kum tin cheng sing sarih, sang sarih zathum (Rs. 77,300) an lakluh thin thu Hospital thawktute chuan an hrilh a ni. Pu Jejea hian Hospital Poor Fund-ah pawisa a hlan bawk.
Jeje Lalpekhlua hi ZPM South Tuipui Block-I hruaitu te, Thalai Block hruaitute thenkhat leh chanchinbu mi thenkhatin an tawiawm a ni.