Kum 2020 December thla atang khan Covid-19 laka invenna tur damdawi chu ram hrang hrangin an rawn tlangzarh hlawm a. India chuan Covaxin leh Covishield te kan hman hnuah kan indaih khawp kan siam theih loh avangin Russia siam Sputnik V te chu lakluh a ni. Mizoramah chuan Covishield hi kan lak ber a ni.
Heng damdawite hi a siamdan a inang lova, chawhpawlh chi a ni em? tih chungchangah hian inhnialna a awm mek. Dose khat damdawi pakhat lak a, dose hnihnaah damdawi dang lak hian kan taksaah Covid-19 natna do pawl pakhat chauh lo a insiam thei dawn tih ngaihdan a awm. Ram thenkhat chuan damdawi inang lo pek hi enchhinna kalpui tawh mah se India erawh chuan a la kalpui ve lo.
Engvangin nge an chawhpawlh?
Scientist thenkhatte chuan damdawi inang lo hman hian kan taksaa natna do pawl chu a tichak zual dawn niin an ngai. Mizoramin kan hman ber Covishield hi viral vector vaccine an ti a, zawnga hritlang natna hrik, adenovirus chu chak lo zawka siamin Covid-19 natna hrika protein chu an dah a. Kan taksaa natna do pawl chuan lo hmelhriatin a lo insiam danglam ta a. Adenovirus hi tum hnih emaw tum thum hman nawn chuan a chak tur angin a chak tawh lo thin. Hei vang hian a dose hnihnaah damdawi danga thlak daih chu a that ring pawl an awm.
Sputnik V hi Covishield ang deuh bawka siam a ni a. Adenovirus chi hnih an hmang thung a, hei vang hian Covishield ai chuan a tha deuh zawk tura ngaih a ni.
Viral Vector vaccine bakah hian mRNA hmanga damdawi an siam te a awm bawk a. Damdawi chawpawlh chuan kan taksaa natna do pawl chu he natna chungchang hi chiang zawkin kan zuk zirtir thei ang a, hri do turin a tha lehzual ang tih tiin mithiamte chuan an sawi. Natna hrik hi a insiam dangalam ve zel bawk avangin taksaa hri lo do thei, antibody insiam a tam zawk theihna tur chuan a damdawi chawhpawlh hi a fuh an ring. A damdawi indaih lohna phuhruk turin a tangkai zual ang, an ti bawk.
A him em?
Hri laka invenna damdawi hi hmanhmawh taka enchhinna kalpui a ni a, natna dang damdawi an siam enchhin hun a pha lo hle. A chawhpawlh phei chu tun hnai lawka an chin tan a ni a, a him em? tih hi a la chiang lova, taksaah natna do thei tha zawk a insiam em? tih pawh hriat a ni lo.
Zirchianna neih tawhah chuan damdawi pahnih, entir nan AstraZeneca leh Pfizer te siam chhuah chawhpawlhin a side effect a na zawk tih hmuh chhuah a ni a. Covishield phei chu thisen khar a siam thei tiin India sorkar chu thuchhuah a lo siam tawh a. Hei hi nemngheh a nih hnuah Germany, France, UK leh Canada te chuan naupang zawkte pek hnena pek loh turin an lo ti tawh.
Hetihlai hian mithiamte chuan kan taksaa natna do pawl hian theihna sang tak mai a nei a. Side effect nasa tak mai, kan taksain a zawh loh tur khawp chu a siam lovang, tiin chawhpawlh hi kan kalphung tur a nih an ring thung.
Viral vector vaccine leh mRNA te hi chawhpawlha an enchhin ber a ni a. Spain leh South Korea te chuan kalpui an tum mek. UK pawhin mRNA leh Navavas te chu enchhinna neiin August thla hian a result a hriat theih tawh a beiseiawm a. Russia leh China chuan chawhpawlh an tum ve mek.
A damdawi hi siam dan chi hrang 8 vel chu kumin December thla hian a awm hman tawh a beiseiawm a. India chuan ram dangin an chawhpawlh ni lo damdawi dang a enchhin thei dawn a. A damdawi chawhpawlh hi a hlawhtling a nih chuan vaccination-a kan kalphung thar tur a ni dawnin a lang.
