Aizawl Thuampui Veng, Ainawn Section-a lungrem chimin a hnawl mi palite ruang chu tukin zing dar 4:30 vel khan lak chhuah fel a ni a, nunna chante hi naupang kum 3-16 inkar vek an ni.
Thuampui atanga thudawnnain a sawi danin lung remin a hnawl in hi mi 7 chenna Assam type, Lalbiakzuala te chhungkaw luah lai a ni a. A hnuaiah hnamdang an cheng bawk. Nizan dar 9:30 vel khan an kawmchhak building sak lai hnuaia lungrem chu a rawn chim a. A chim hma hian Lalbiakzuala te chhungkua mi 6 an awm a, an insaseng hman lo. An inhnuaia mite erawh an tlan chhuah hman avangin an him thung.
In chim atang hian chhungkaw pa ber Lalbiakzuala chu a vak chhuak thei a, hliam na vak lo a tuar. Khawtlang, mi tlawmngai leh Disaster Response Force te chuan in chim kara tang hmeichhe pakhat an lak chhuah leh hnuah in chim kara tangkhangte zawn hna chu thawh chhunzawm a ni a. Tukin zing khan ruang hmuh kim nin nunna chante hi Lalthlamuani (16), Joseph Lalrinhlua (5), Lalngaihsaka (3) leh Laltanpuii (16) te an ni a. Vawiinah vuiliam an ni ang.
Mizoram Chief Minister Pu Zoramthanga chuan he chhiatna thleng hi pawi a tih thu leh a tuartute chu chhawmdawlna awm theite ngaihtuahsak an ni tur thu a sawi.
