Mizoramah nimin khan hri kai hmuh chhuah tam ber tum thleng mah se ni 10 chhunga hri kai hmuh chhuah zat chuan ziaawm lam a pan nasa hle.
Nimin (June ni 9, 2021) ah khan hri kai mi 347 hmuh chhuah niin ni khata hmuh chhuah tam ber tum a ni a, mipa 154 leh hmeichhia 193 te an ni. Mipa hi mi 1669 endik niin positive hmuh chhuah hi 9.2% a ni a. Hmeichhia 1668 endik atanga positive hmu chhuah zat chu 11.5% a ni a, a pumpuia posivite percentage chu 10.39% a ni. Positive zingah hian symptoms nei 188, nei lo 139 leh hriat loh 20 an awm. Hri kai hmuh chhuah dan chu:
- Aizawl District: 246(71%)
- Kolasib District: 50(14%)
- Lawngtlai District: 31 (8%)
- Lunglei District: 12 (3%)
- Saitual District: 5 (1%)
- Siaha District: 2 (0.5%)
- Khawzawl District: 1 (0.2%)
Hri kai hi ni khata a tam ber tum ni mah se ni 10 chhunga hri kai zat chuan ziaawm lam a pan hle. May ni 31 atanga June ni 9 inkara hrikai hmuh chhuan zawng zawng chu 2463 a ni a. May ni 21-30 ah 2368 niin hri kai punna chu 4% a ni a. May ni 11-20 a mi 1941 hmuh chhuah leh May ni 21-30 a punna zat 22% atanga ngaihtuahin ni 10 chhunga kan punna chu a tlahniam hle.
Dama chhuahtir pawh 33% in ni 10 chhung hian a pung bawk. May ni 30-June ni 8 khan chawhrualin ni khatah mi 107 chhuahtir ang a ni a. A hma ni 10 (May 20-29) chhungin chawhrualin mi 80.5 an chhuak a ni a. May 10-19-a chawhruala dama chhuahtir mi 119.4 atangin ni 20-29 chhunga chhuahtir chu 32.5% zetin a tla hniam hman a, tunah 33% in a pung leh tawh thung.
Hri kai enkawl ngai erawh pun lam a pan zel a. May ni 11-20 chhungin chawhrualin mi 2121.6 a nih laiin a hnu ni 10 (May 21-30) ah chawhrualin 2735 an awm a, an punna chu 29% a ni a. May 31-June 9 hian chawhrualin active case hi 3354 niin ni 10 chhunga a punna chu 23% a ni. Ni 10 chhunga hri kai thar hmuh chhuah zat chu dama chhuahtir zat aia a tam avangin active case hi a la sang ta zel.
