August 5, 2024 : MZP Hqrs Champhai chuan Govt Champhai College-a zirtirtu dah belh phuta lungawih lohna lantirin vawiin khan Champhai district chhunga zirna in leh sorkar pisa kai tur an dang.
Govt Champhai College-a Political Science leh Economic Dept-a zirtirtu dah belh phut hian kar kalta zirtawpni khan Govt Champhai College zirlai leh zirtirtute class kal tur an dang tawh a, Inrinni khan Higher & Technical Education dept changtu Minister hoa meeting-in August thla chhungin College hrang hranga thawktute siam rem tum tho a nih avangin tun dinhmunah College pakhat chauh lo khawih bik a rem loh avanga an nawrh titawp tura an ngena chu Inrinni zana an ngaihtuah hnuah an thil phut chu tihhlawhtlin mai theih ni-a an ngaih avangin vawiin khan Champhai district chhunga zirna -in leh sorkar pisa zawng zawng kai tur hi an dang ta a ni.
MZP Hqrs Champhai hruaitute chuan an thil phut hi a hlawhtlin hma chuan tiam chin awm loin zirna in leh Pisa kai turte hi dan an tum thu an sawi a, Higher & Technical Education Minister Dr. Vanlalthlana insawifiahnaa hma an lak nghal thu a sawi chu rin har an tih thu sawiin July ni 18-ah Minister hi hmuh an tuma a lo awm loh avangin a office-ah lehkha an hnutchhiah a, engmah chhanna an dawn loh hnuah Minister office-in July ni 26-ah a soft copy an dil leh chauh niin an sawi a. Minister hnenah zirtirtu dah belh tura ngenna an thlehluh leh PR an siam inkarah engmah chhanna an hmuh loh avangin PR an siam hnuah chauh an ngenna hi ngaihtuah chuah ni-a an ngaih thu sawiin a tirah chhanna mumal tak dawng nise chuan tun dinhmun hi thlen an tum loh thu an sawi a; Political party zinga an mawng hiattu an awm ni-a puhna awm chu MZP Hqrs Champhai chuan chutiang an awm loh thu leh Champhaiin zirnaa hma a sawn theihna tura hma la chauh an nih thu an sawi bawk.
Vawiin MZP Hqrs Champhaiin lungawi lohna lantira zirna in leh Sorkar Pisa kai tur an dan avang hian boruak duhawm lo a thlen hriat a ni lo a, zirna in kal tum thenkhat chu dangin haw tir leh an ni a, Pisa kai luih tum an awm hriat a ni lo.
MZP Hqrs Champhai President Pu H Lalruatdika chuan Education Minister sawifiahnaah thu dik tawk lo a awm thu a sawi
