‘Sorkar hmalak mekna hrilhhriat an ni chunga MZP Hqrs Champhaiin hma an la chhunzawm hi a pawi ka ti”. Dr. Vanlalthlana, H&TE Minister
August 5, 2024: Higher & Technical Education Minister Dr. Vanlalthlana’n Mizoram puma college zirtirtute khai rual zawka sem rualna kalpui tur a nih tur thu leh fimkhur taka sorkarin hma a lak mek thu hrilhhriat an nih hnu pawha zirna in leh sorkar hna tikhaihlak zawnga MZP Hqrs Champhaiin hma an la chu pawi a tih thu sawiin an hmalakna chhunzawm tawh lo a, zirtirtu semrualna an kalpui mek chu lo ngai chang hram hram turin a ngen.
Vawiin khan Higher & Technical Education Minister Dr. Vanlalthlana chuan Govt Champhai College chu sorkarin a duhsak em em thu sawiin RUSA leh PM USHA atanga thuam that mek a nih bakah zirtirtu dah belh chungchangah pawh a hrana post siam belhna tur thutlukna pawh siamsak an nih tawh thu a sawi a, Mizoram puma college zirtirtute khai rual zawka sem rualna kalpui tur a nih tur thu leh fimkhur taka sorkarin hma a lak mek thu hrilhhriat an nih hnu pawha zirna in leh sorkar hna tikhaihlak zawnga hma lakna a awm chu pawi an tih thu sawiin college pakhat tan bika transfer tih chuan an zirchianna a tihbuai theih avang leh thil tha lo dang a hrin chhuah theih avangin MZP Hqrs Champhai chu an hmalakna chhunzawm tawh lo a, zirtirtu semrualna an kalpui mek chu lo ngai chang hram hram turin a ngen a. Dr. Vanlalthlana chuan zirna in dang zawng leh sorkar pisa kai tur dang zawnga hma lak a nih hian a tuartu ber chu zirlaite leh sorkar behchhana hnathawkte an nih thu sawiin a tawpah chuan mipuite’n an tawrh phah thin niin a sawi bawk.
Higher & Technical Education Minister chuan MZP Hqrs atangin kumin May ni 3 leh July ni 18-ah lehkha an dawn thu leh Minister leh Commissioner hova sawiho nghal a nih thu sawiin Zirtirtu sem rual chu sorkarin hma a lak mekna a nih avang leh hmun dang atang pawha lehkha an dawn tho vangin a rang thei ang bera kalpui tura thuthlukna an siam thu a sawi a. Dr. Vanlalthlana chuan Zirtirtu sem rual kalpui tur chuan zirlai awm zat, zirtirtu hman theih zat, section awm zat, Major leh Multi disiplinary paper la zat bakah zirtirtute posting history kim chang neih vek a ngaih thu a sawi a, hmanhmawh taka tih chuan tihsual neih palh a hlauhawm avangin ngun taka zirchianna neih mek a nih thu sawiin Zirtirtu sem rual tur hian inrawnna neih ngaite a awm bakah ruahmanna awmte sawiho a ngai thin tih sawiin an sorkar zirlaite dinhmun ngaihtuah chungin hma a la zel dawn niin a sawi bawk.
