August 1, 2024: MZP Hqrs Champhai chuan Govt Champhai College-a zirtirtu indaih lohna chungchanga Sorkara an thu thlengin awmzia a neih loh avangin naktuk atangin Govt Champhai College zirlai leh zirtirtute class kal tur an dang dawn.
MZP Hqrs Champhai chuan hun rei tak atang tawhin Govt Champhai College-a dept thenkhatah zirtirtu indaih lohna a lo awm tawh thin a, dept thenkhatah zirtirtu dah belh ni mah se, dept thenkhatah zirtirtu indaih lo takin an awm mek a. MZU ordinance-ah dept pakhatah zirtirtu 4 tal awm tura tih a nih laiin Political Science leh Economics Dept-ah zirtirtu pathum chauh an awm a, zirtirtu leh zirlai ratio atanga chhutin zirtirtute hian an enkawl zawh bak zirlai an enkawl niin an sawi a, New Education Policy System hman a nih hnuah phei chuan zirtirtu indaih lohna hi nasa zual hle ni-a sawiin MZP Hqrs Champhai chuan Govt Champhai College-in NAAC Accreditation an hmachhawn turah zirtirtu indaih lohna Dept avang hian Grade tha hmuh theihna kawngah nasa takin a tlahniam thei tih an sawi bawk.
MZP Hqrs Champhai chuan chuan Govt Champhai College-a zirtirtu indaih lohna chungchang hun rei tawh tak atangin an buaipui tawh tih sawiin sorkar hmasaah vawi eng emaw zat an thlen a, sorkat tharah pawh beiseina sang tak nen a changtu Minister hnenah lehkha thehlutin an bawhzui tawh niin an sawi a. Hun rei tak an nghah hnuah kumin July ni 18 khan Higher & Technical Education dept changtu Minister hnenah lehkha thehlut lehin July thla chhunga zirtirtu indaih lohna hi hnawhkhahsak turin an ngen leh a, an ngenna hi ngaih pawihmawh a nih tak loh avang leh sorkar atanga eng thu leh hla mah an dawn tak loh avangin naktuk atangin an thill phut a hlawh tlin nan leh sorkar laka an lungawi lohna lantir nan Govt Champhai zirlai leh zirtirtute class kal tur an dang dawn tih an sawi a, an hmalaknain awmzia a neih loh chuan a tul ang zela hmalak chhunzawm zel an tum thu an sawi bawk.
