India rama inneihnaah ve thung chuan chhiarkawp thiam loh avangin innei turte an inthen phah.
Hei hi Mahoba-a thleng a ni a, chhungkaw insawiremna vang a ni pakhat. Moneitu tur hian in atangin sakawr tawlailir nen an inneihna hmun tur a rawn pan a, khuang leh lamin a thiante leh a chhungte chuan an rawn zui a. Inneihna hmun turah hian mo tur chuan a lo nghak ran tawh.
Mo tur hian a pasal tur hi rinhlelhna a nei a, a pawl san ang aiin a mawl a ti deuh hlek a. Chuvangin a pawl zat nia a sawi chu a ring ngam lo. Moneitu tur chu a rawn thleng ta a, inkutsuih a, innei tawh mai tur an nih laiin thutiam an chham hmain mo tur hian fiahna a neihtir ta a. An inneih hriatpuitute hriat theih turin a pasal tur chu pahnih hmun a sawitir.
A pasal tur hi a pawl san aiin a mawl tih tur chu a lo hrim hrim e, pahnih hmun pawh chu a sawi hleithei ta lova. Mo tur hian a pasal tur leh a chhungte chuan a zirna chungchangah dawt an sawi tih hre chhuakin maicham atang hian a chhuk a, inneih chu thulh a ni ta der mai a. Mo tur hi thlem ngial mah se pahnih hmun sawi chhuak thei lo pasala neih chu a duh bik tlat lova, inneih thilpek te pawh an inpe kir leh ta ringawt mai a ni.
China-a Pingsingshan khuaa inneihnaah erawh mo thian pathumte chu mipa vek an ni. Mo thianah hi chuan hmeichhia an tang tlangpui a, mahse he innneihnaah hi chuan mo thian kawr sendang ha a, samlem vuahte hi en mai pawhin mipa an ni tih chu hai rual a ni lo.
Eng vanga he mo hian thian atana mipa pathum hmang nge an nih tih chu hriat a ni lova, mahse a thiante hian hmeichhe lema tan chu nuam an ti chiah lo tih erawh chu an hmel atangin a hriat theih thung. Mo unaupa hian a thiante hi phur takin a pui a, he nu hian hmeichhe thian a nei lo hrim hrim a nih loh chuan pawisa sengin thian tur a ruai a ni ang tih hi mi tam tak ngaihdan a ni. Mahse pawisa senga thian ruai turah hmeichhe pangngai rawih ve mai chu a ni bawk si.
