June 29, 2024 : Nizan dar 9:30 vel khan Champhai Police te hian Chalbawia Junction Khankawn Police Check Gate-ah Zokhawthar atanga Aizawl pan tur Maxi Cab pakhatin theihai a phurh kara thuhruk heroin hawng 10, gram 118 a rit an man a, Lirthei khalhtu hian Theihai hi Khawmawi, Myanmar-a mi pakhatin thawn niin a sawi a, Aizawla a lo lam tura a sawi mi 2-te chu tukkin khan Aizawl-a Champhai Maxi cab counter-ah man an ni.
Champhai Police-te hian tukkin dar 7:00 khan Champhai Police check gate paltlang tur LPK Tipper Balu phur an endik a, Balu hnuaia thuhruk Foreign Beer case 72 leh Apple Juice um 480 an man a, heng ruihhlo man te hi tualchhung hralhnaa chhutin cheng 9,34,000 hu a ni a, lirthei khalhtu leh a neitua puh ni bawk Rodawnliana, Zokhawthar khua ni-a insawi chu manin MLP Act hnuaiah thubuai samsak a ni a, a lirthei pawh hi hren sak a ni.
