June 26, 2024 : Vawiin khan Champhai Police huaihawtin khawvel puma Ruihhlo dona ni ‘International day against drug abuse and illicit trafficking 2024′ hman niin ruihhlo cheng Vbch 30,Nuai 43 leh Sing 8 Sang 1 hu halral a ni.
Vawiina ruihhlo halral takte hi Champhai District Police-in Kum 2022 November thla leh kum 2024 January thla chhunga an man niin Heroin Kg 25 leh Gram 292, Methamphetamine Kg 105 leh Gram 877, Crystal Meth Kg 3 leh Gram 28, Ganja Kg 5 a ni a, heng ruihhlo hal ral tak kaihhnawihah hian ND&PS Act tlawhchhanin thubuai 110 ziah luh niin Court trail kal lai mek an ni.
Champhai District chhunga Police Station pathum Champhai, Zokhawthar leh Dungtlang-ah te kum 2023 chhung khan ND&PS Sct hnuaiah thubuai 132 ziah lut niin mi 153 an man a, an zinga mi 41-te chu ram dang mi an ni a, nikum chhung khan Herioin Kg 33 leh Gram 502, Methamphetamine Kg 110 leh Gram 903, Crystal Meth Kg 4 leh Gram 59 an man tawh a, kumin chhungin ND&PS Act hnuaiah thubuai 101 ziak lut tawhin hemi kaihnawihah hian Heroin Kg 35 leh gram 711, Methaphetamine Kg 67 leh gram 874, Crystal Meth Kg 14 leh Gram 490, Ganja Kg 22 leh gram 5 an man tawh bawk a ni.
Ruihhlo halralna hun hi Dennis Vanlallura, DSP Champhai chuan kaihruaiin James Lalrinchhana, Champhai Bawrhsap-in khuallian niin a hmanpui a, khuallian chuan ruihhlo do rem turin tanrual a ngaih thu sawiin “Sorkar Dept leh mipuite’n tangruala kan do chuan rei lot-ah kan do hneh vat dawn a ni’ a ti a. Vawiina ruihhlo tam tak halral tur a awm chu tanho thatna vang a nih thu sawiin tha thlah lo turin mipuite a sawm a. Ruihhlo laka invenna pawimawh ber pakhat awareness campaign chu uar zawka kalpui a tul thu a sawi bawk.
Champhai SP Vineet Kumar, IPS chuan ruihhlo tawlhruk leh hmansual dona kawnga sorkar agency hrang hrang Assam Rifles, Excise & Narcotics Dept, Custom Preventive Force, SIB, SB leh khawtlang hruaitute leh chanchinbumite tanpuina leh tanrualna avanga ruihhlo thahnem tak man chhuah a ni thei chu lawmawm an tih thu a sawi a, Police tha tichak tura theihtawp chhuahpui turin mipuite a sawm bawk a ni.
Vawiin hian Champhai Police hian Ruihhlo an manna kawnga theihtawp chhuahpuitu Dungtlang VDP, Kelkang VDP leh Ngur VDP te chawimawina leh lawmthu sawina thilpek an pe a ni.
