MZP Hqrs.Champhai hruaitute chuan vawiin khan Champhai khawpui chhunga Hnam dang, Dan lova sumdawnna kalpui an awm leh awm lohte enfiahin Myanmar atanga raltlan te an awmna hmunah tlawhin Dan lova chetna laka fimkhur turin an hriattir.
MZP Hqrs Champhai hian thuchhuah siamin Champhaiah hnam dang lirtheia bungrua sem kuala sumdawng an awm tha lo an tih thu leh Champhaia dan lova sumdawnna kalpui chu na zawkin an do tur thu an sawi a, vawiin khan Hnam dang dan lova sumdawng an awm leh awm lohte an enfiah a, ILP-in a huam chin baka sumdawnna leh thil dang tih chu dan kalh a nih thu hnam dang Champhaia awmte hi an hriattir a, Two Wheeler Taxi driver zingah India mi ni lo, raltlan zingah driving licence neia service an awm leh awm loh an enfiah nghal bawk a ni.
MZP Hqrs Champhai hruaitute chuan vawiin khan Zote khaw daia ITI Buildinga raltlan mi 116 awmte chu tlawhin raltlante chu Mizoram sorkar, Kohhran leh tlawmngai pawl hrang hrangte’n tha taka enkawlin lo dawngsawng mah se, India khua leh tuite chauhin an neih theih Photo Identity Car, Driving licence, Aadhaar card, ration card, birth certificate leh thildangte dan lo anga neih tum lo turin an hrilh a, heng bakah hian ram leh hnam hmelma ruihhlo tawlhnaa inhnamhnawih lo tur te, mi huan lo rama thlai, Sangha leh thil dangte a ruka laksak lo turin an hriattir bawk a ni.
