May 31/2024: Champhai Police leh Assam Rifles tangkawpin Heroin tam tham tak hmun hnihah an man.
Nizan dar 8:45 vel khan Champhai Police leh 42 Assam Rifles COB tangkawpte chuan Lirthei pakhat Assam registration atangin Heroin Kg 1 leh Gram 219 a rit an man a, Champhai Police-te sawi danin he lirthei hian nimin zing dar 8:30 khan Khankawn Police Checkgate a paltlang a, lirthei hi chhui zui niin Champhai Zote atanga Myanmar ramri thlengin a kal tih hriat a ni a, a haw leh lam hian Assam Rifles check gate chak takin a tlan pel a, he mi hnu hian Police leh Assam Rifles-te hian an umzui a, nizan khan dar 8:45 vel khan Champhai Police Chekgate atanga metre 600 vela hla, Champhai leh Khankawn inkarah lirthei hi hmuh niin a khalhtute hi an lo tlanbo hman a, lirthei hi endik niin Heroin-te hi man a ni a, Champhai Police station-ah thubuai ziah luh niin a neitute hi zawn zui mek niin ruihhlo phurhna atana hman lirthei hi hren zui a ni.
Nimin tlai khan Zokhawthar Police leh 42 Assam Rilfes tangkawpte chuan Melbuk daiah Joint operation an nei a, tlai dar 6;15 vel khan lirthei pakhata chuang Lalruatkima, Champhai Kahrawt Veng ni-a insawi hnen atangin Heroin hawng 13, Gram 146 an man a, Lalruatkima hian a kawr lum chhungah heng heroin-te hi a thukru a ni. Heroin neitua puh hi ND&PS Act hmanga thubuai siamsak niin vawiin khan Champhai District Court-ah hruai niin Lung inah khung nghal a ni.
===================================
