MPSC chhui tura ruat M Lalmanzuala chuan nimin khan sorkarah report a thehlut a, vawiin khan report hi thuneitu sanga kal chho zel turin buaipui mek a ni.
MPSC hnuaia MCS Combined Competitive Examination 2023 leh hna dang laknaah thil fel lo a awma ngaiin Mizo Zirlai Pawl chuan MPSC Chairman bang turin an phut a, he thilah hian tun thla ni 15 leh ni 16 khan MPSC hnathawkte pisa kai tur pawh an lo dang tawh a.
Mizoram sorkar Vigilance department chuan tun thla ni 15 khan Mizoram Chief Secretary lo ni tawh leh MPSC Chairman pawh lo ni tawh M. Lalmanzuala chu hemi chungchang chhui tur hian Inquiry Officer (I.O.) atan a ruat a. Ni 7 chhunga chhui zo hman tura tih niin ni 7 chhung hian MPSC pisa pawh khar a ni a. Sorkarin a beisei hunah chiah nimin khan MPSC chhuitu Pu M. Lalmanzuala chuan report hi a thehlut a ni.
