Kum 1972 October ni 13, Zirtawpni tak a ni a, thlawhnaah chuan ka thianpa Panchito nen kan thudun a, tukverha dak pah chuan a kiuvin min rawn nghawk zauh a, “Nando, tlang hi hetiang em ema hnaih tur kan ni lovang i ti ve lo maw?” a rawn ti a. Kan thutna lai chu thlawhna khawl pahnih bul lawkah a ni a, thliin a rawn beng fuh chuan kan thlawhna chu a insawi leh lawp zel. Steward-in in seat belt kha hreng nghet rawh u a rawn tih pawh chu thil awm tak a ni.
Ni malsawm lo tak, Friday the 13th-a Andes tlang sang tak mai paltlang kan tum chu fiamthuna atan tak kan hmang a, kan la thalai hlawm bawk a, heng puithuna tih bawr vel hi kan buaipui meuh lo. Thlawhnaah hian kan rugby team kan chuang a, kan khua Uruguay-a Montevideo atangin Chile-a Santiago khawpui lam kan pan a, rugby kan va khel dawn. A chhunga chuang hi thlawhna hnathawk mi 5 tiamin 45 kan ni a, a tam zawkte chuan ka thiante, ka team mate te an ni a, ka chhungte zinah ka nu Eugenia leh ka farnu kum 22 mi Susy te pawh an tel.
Kan thlawhna lian lo tak Fairchild hi feet 22500 aia sanga thlawk zo lo tur a nih avangin Uruguay atang Santiago thleng tur hian pilot chuan Mendoza atanga Planchon Pass, mel 300 vela thui chu min zawhpui a, hei hi Andes tlang leh tlang inkara awl zimte a ni. Tukverh atanga ka han dah chhuah chuan tlang pang kham chu vur hian a bawh var vo mai a. Khawvel chhim lama awm kan nih angin thlasik a liam a, thal a intan chho mek. Mahse Andes tlangah erawh chuan thlasik a la na khawp mai, degree centigrade minus 37 vel te hi a vawh dan a ni.
Ka rilruah ka pa, Seler-a a rawn lang a. Thlawhna tum hmunah min rawn thlahliam kha a ni a, hun nuam tak va hmang rawh u, Thawhtanni-ah ka lo hmuak leh ang che u, tiin min thlah kha a ni a. Kan awm lo chhung hian a hardware dawr nghakin a lo tul hle dawn a, a thawhrimna hi Parrado chhungkaw tan chuan malsawmna a ni.Pa ber a nih angin kawng engkimah a kutah hian kan innghat hle bawk.
Kan thlawhna lai chu chhum chhah tak hian a rawn bawh phui chuk a, chuti chung chuan min karchehtu tlang pang leh vur te chu a la lang chiang hle thung. Thawklehkhatah kan insawh dawrh a, kan thlawhna thla chuan metre 10 vel chauhvin tlang chu a dek tawh lo. Chutah thlawhna khawl tang thawm a rawn ri chhunzawm nghal zat a, tlang lawn liam a tum tih ka hrethiam nghal mai.
Ka hmaa thu ka nu leh ka farnu chu an rawn lehhawi a, kan mit a intawng chiah tihin thlawhna chu na tak mai hian a insawi ta dawrh a, thirin thil a hrut ri pawh a ring kher mai. Thlawhna chung lam chu a inhawk a, thli vawt tak a rawn lut nghal a. Chumi hunlai chuan thil engmah ngaihtuah hman a ni tawh lova. Tawngtai leh hlau tur pawhin hun a awm lo. Kut chak takin min thehphar ang mai hian ka thutna chawp chuan ka insawi lawp lawp a, thlawhna hma lamah ka tawlh phei lai chu ka la hria, a hnu erawh chu thim leh reh hmuk hi a ni tawh thung.
Ka hmai zawng zawng chu thi kharin a bawm a, hmun tin mai a hliam bawk. Ka lu sawhna phei chu basketball tiat velin a pawng a, ni khaw hre lova ka awm pawh chu a mak tehchiam awm love. Kan chetsualnaa dam chhuakte chuan min rawn buaipui vat vat hi a ni awm e, ka mar phu chu la hmu mah se ka hliam a nat em avangin ka dam chhuah an beisei lo hle hi a lo ni.
Kan thlawhna Fairchild chu tlang metre 4000 vela sang, vurin a bawm khah tlat maiah a innghat a. Kan chetsualnaah hian mi 13 an thi a, mi 32 kan dam chhuak a, dam chhuak zingah hliam tuar lo erawh kan awm mang lo. Arturo chuan a ke pahnih a titliak a, Enrique-a pum chu inches 15 vela sei thir tube hian a chhun bawk a. Lu-a hliam tuar pawh kan tam khawp mai. Hliam na vak lote chu chhanchhuah hna leh bawihsawm hnathawktuah an tang zel bawk.
Ni thum chhung lai mai engmah hre lova ka awm hnuah ka harh chhuak a, tuipui thim tak atangin zawi muangin eng awmna lam pan ta ila, chutiang chu ka harh chhuah dan chu a ni deuh ber awm e. Ka bulah chuan ka teammate Gustvo hi a lo thu a, “Nando, i tui a hal em?” tih pahin ka kaah vur chu a rawn dah nghal a. Ka han lem chu ka taksa chhung a vawt thla nghal rawih rawih mai. Mahse ka dang ro lutuk tihreh nan ka ei lui hram hram a. Ka bul velah chuan na ti rum thawm a tam khawp mai. Ka ngaihtuahna a fim ta deuh bawk a, thlaphanna chang ka hre ve ta. Gustavo chu ka hui a, a rawn hnaih chuan, “Khawiah nge ka nu? Khawiah nge Susy?” tiin ka zawt a. Hlim leh lungngai hmel pawh lang miah lovin, chawl hahdam rih phawt teh. I taksa a chu em mai, min ti a.
Thlawhna bung chhuat vawt takah chuan ka lu hi a inthum rawn tluk tluk a ni ber mai. Ka nu leh ka farnu aw hre turin ka beng ka chhi a, hriat tur a awm lo. Ka lu chu kan dap a, ka sawh nain khawi emaw lai chu a khi ngei tih ka hria ka pum lah chu a na kher mai. Gustavo chu vur tlang kengin a rawn ka leh a, a bana chelh pahin, Khawiah nge an awm?” ka lo tih leh a.
Ka mit takah min rawn en a, a thu min hrilh tur dawngsawng turin ka rilru a fim tha tawkah a ngai a ni maithei. “Nando, i intihchak lehzual a ngai. I nu chu a thi tawh, a ti a, thlawhna hnung lam chu a kawk a, sawtah sawn i nau chu a awm, a hliam na khawp mai.” a ti ta a. Manganna leh hlauhthawnnain ka khat a, mahse tah erawh ka tum lo. Mitui hi taksaa al paih chhuahna a ni, al hi dam chhuak turin ka la mamawh dawn tih ka hria. Ka nu thih thu hi ka tan chuan khawvela chanchin duhawm lo ber a ni a, ka farnu pawhin thihna lamtluang a zawh mek bawk a, ka luh a keh lo chauh nen, ka tap lo chu thil mak te pawh a ni hial ang. Mahse tap thei ka ni tlat lo. Anni chu an kal tawh a, hmalam ka pan a ngai, dam chhuak turin theihtawpa ka beih a ngai tlat a ni.
Ka kiuva inbeng khalh chungin Susy lam chu thei leh thei lovin ka va thleng hram a. A hmaia thi chhuahnate chu an lo hru fai tawh a, a bulah chuan min mut a. A kutah ka kuah a, Susy, i u ka ni e, ka ti a. Susy chuan min rawn melh a, mahse a mitmeng atang chuan min hmu lo tih erawh a hriat theih thung. A theih ang angin ka kuah lum a, Andes tlang vawt tak maia tang kan ni nen, chu aia tha chu han tihsak theih phei chu ka nei lem lo. “Lungngai suh, min rawn zawng hmu ang a, min rawn chhuanchhuak vat ang, tiin ka hnem thin a.
Kan chetsual tirah kha chuan min rawn zawn chhanchhuah kha kan dam chhuah dan turah kan ruat a, chu bak beisei ngam pawh kan nei lo. Mahse ni chu tlang khawkrawk karah chuan a her liam a, eng awm miah lo karah khawvawt chuan min han nghaisa ta mai thin a. Zan khat pawh chu a rei duh kher mai.
Ni li hnu, kan chetsual atanga ni 8-naah chuan Susy chu a chau hle a, a thlarau a thlah mai dawna hriain ka mangang hle a, “A ni thei lo. Susy, a ni thei lo” tiin ka au a, mahse ka mittui erawh ka seng lo. Mittui hi taksa al paih chhuahna a ni. Susy ka sun zo chu intiamna ka nei ta a, ka pain kan khuaah min lo nghak a, ka kir leh tur a ni, tiin, he tlang vawt hi thlanmuala hman ka tum lo.
Mi 45 zingah mi 27 kan la dam a. Tui in tur atan vur tituiralin kan in mai thin a, a lum thei ang bera inthuamin zanah phei chuan a khawmin kan mu thin a, thaw inhipsak khawpin kan inhnaih thin. Zingah tukthuan atan kan rugby team captain Marcelo chuan kan eitur neih ang ang chu a ren thei ang berin a sem thin. Chaw tan hian thei ro, chocolate, thei mu, jam leh zu tlem kan la nei a. Ni khatah peanut leh chocolate tlem hi kan ei dan a ni tlangpui.
Ka luruh khi chu engemaw ti hian amahin a dam chho a, ka taksa pawhin that lam a pan ve zel bawk a, thil pangngai tak phei chu a ni kher lo maithei. He tlang hian chhel turin min chher hriam a, ka taksa leh ngaihtuahna te chu an a ti fip zo ni ten ka hria. Kan eitur chu a ni telin a tlem tial tial a, ka ken lai peanut chu kan eitur zawhna a nih tawh avangin a rei thei ang ber rin ka tum a, a chocolate zawng chu ka nilengin chaw atan ka hmang a, a peanut la bang chu ka ak tha a. A tukah peanut chu hmun hnihah ka then leh a, a phel chu ka ak tha a, a phel lehlam chu a ren thei ang berin ka ei a, a thial pawh ka thial phal lo. A tukah ka ei tur neih chu ka ei zo ta a, tunah chuan kan ei tur neih ang chu a zo ta. Riltam chiah kan hmabak tawh.
Kan tanna hi metre 4000 chuanga sang a ni a, chakna thahrui kan mamawh takzet. Kan tanna lai thleng chho a, taksa rihna hloh lo tur phei chuan calorie hi ni khatah singkaht tal kan mamawh dawn hi a lo ni. Keini chu tlangah hian kan lawn lova, mahse kan awmna hmun a san avang hian thahrui chu hmun hniam zawka mite aiin kan mamawh zawk hrim hrim thung. Kan eitur kan ei zawh hma khan ni khatah calorie za emaw vel chauh kan dawng a,tunah pheichuan eitur kan nei tawh lova, calorie hmuhna tur a awm tawh lo. Kan that vanglai, kan taksa pawh a chak vanglai tak ni mah se eitur mumal han neih loh takah chuan kan cher chakin ka sa a pan hlawm hle.
Kan tamchhawl mangang tawh chuan kan savun ip chu ei kan tum a, ei a har khawp mai. Thlawhna seat-ah chuan buhpawl a lo awm mial takin tiin khan han thet darh a, mahse seat dup chi hi an lo hmang vek thung a. Chhanchhuah kan hnih hma chuan he hmunah hian aluminum, plastic, vur leh lung bak a awm lova, chhanchhuah hun heng ei theih loh karah hian kan daih kher ang em tih a ni. He thlawhna laktlak loh zetah hian eitur pakhatmah a awm lo tia thinrim au lawng lawng pawl an awm te pawh chu thil awm tak a ni.
Eitur hi chu a awm tehmeuh mai. Kan thlawhna bung bul velah chuan vurin a hmeh khang mihring ruang a let reng a. Hei hi kan chhehvel km 200 biala eitur chu a ni deuh mai awm e. Mahse ei tinah kan tin ngai lo, mihring sa han ei chu mihring vek tan chuan ngaihtuah ngam chi a ni tlat lo. Mahse tuk khat chu ka bula ruang let reng, a ke hliam lai chu rilru dang puin ka en reng a, ka hawi kual chuan midang pawhin chu rilru pu bawk chuan an lo thlek tih ka hmu a. Kan ngaihtuahna a inhrethiam tawn a ni chek ang chu, zak chungin hmun dangah kan hawi sawn theuh a. Hemi tum hian mihring taksa chu chaw angin ka hmu a ni.
Heng ruangte hi kan dam chhuah dawn leh dawn loh hriltu tur a ni tih ka hria a, mahse han ei em chu a rap hian min rap ngawih ngawih thung a, a ngaihtuahna chu a sawi pawh ka sawi chhuak ngam ngai lo. Mahse zan khat chu ka zep zo tawh ngang lo, thim zinga ka bula mu Calitos chu ka va be ta chawt a, i la meng em? zawi tak hian ka va ti a.
Tunge hetiang vur bawmah muhil theil ang?, a lo ti a. I ril a tam em tia ka zawhna chu, eng vangin nge a tam loh tehlul ang, ni engemaw zat chhung engmah kan ei tawh lo hi a lo ti bak hluk a. Kei chuan, he hmunah hian riltamin kan awm zel dawn. Min chanchhuahtute hian a hun takah min rawn hmu hman kher pawhin ka ring lo. Mahse he hmunah hian thih ka tum lo, inah ka haw leh dawn, ka ti a.
Carlitos chuan, Nando, in lam pan turin i taksa a chau lutuk, min ti a, chaw ka ei loh vang chuah a ni, tia ka chhanna chu, engtin nge i tih chuan ang? Eitur a awm hleinem tiin min chhang a. Kei chuan, eitur chu a awm alawm, ka sawi awmzia i hrethiam em? ka ti a. Min rawn chhang tawh lo, thim karah chuan ka thusawi chu a ngaihtuah tih ka hria. “Kan pilot sa hi ka hlep dawn. He hmuna min dahtu hi a ni a, kan chhuah lehnaah pawh chuti zawng chuan a tangkai ang. Kan thiante hian an ruang hi an mamawh tawh love, ka ti a.
A tukah chuan Carlitos chuan kan inbiakna chu mi thenkhat a hrilh a, anni pawhin ka ngaihtuah ang chu an lo ngaihtuah ve thu an lo sawi hlawm a. Roberto, Gustavo leh Fito te phei chuan kan dam chhuah theihna awmchhun niin an ngai. Kan sawiho fe hnuah inhmuhkhawm koh kan rel ta a, kan vaia ngaihdan lak a, thutlukna siam kan tum a ni. Inhmuhkhawm chu October ni 22, Pathianni-ah thlawhna bungah chuan kan nei a. Roberto chuan kan thu khel tur chu a rawn khuh hawng a.
Kan ril a tam, a han ti a, thahrui hmuh nan protein pai kan ei vat a nih loh chuan kan thi ang. Protein kan hmuh theihna awmchhun chu kan thiante sa hi a ni, a ti a. Thlawhna bung chhung chu thehmeh ang maiin a reh thap mai. Rei fe hnuah pakhat chuan, kan thiante sa kan ei ang i tihna a ni maw?” a rawn ti a. Roberto chuan, “He vur ram hremhmunah hian eng chen nge kan tan dawn tih hriat a ni lo. Mahse thil kan ei lo a nih chuan ka thi ang. Chu chu a chiang. Kan chhungte hmuh leh kan la duh a nih ngai chuan hei hi kan tih tur awmchhun chu a ni, a ti a.
A thusawi chu mak tia lo ngaithla tawk an tam khawp mai, “Chutiang chuan lo ti ta ila, engtin nge kan thlarau a awm tak ang. Pathianin a ngaidam thei dawn em ni?” an ti a. Roberto vek chuan, “Kan eilo a nih chuan thih kan thlang tihna a ni. Chu chu Pathian remtih zawng a ni dawn em ni? Kei chuan Pathian hian dam chhuak tura theihtawp kan chhuah hi a duhdan a nih ka ring zawk, a ti a. Kan thu khel chu darkar tel kan sawiho a, thu han pawhchah ngawt erawh kan ngam meuh lo. A tawpa tawpah chuan kan ngaihdan a inang tlang ta a, ngawi rengin thu kan pawtchat ta a ni. Chumi hnuah intiamna nei turin kan inkai kual a. He hmunah hian ka lo thi a nih chuan ka thian la damte hian ka ruang chu chaw atan an hmang thei ang tih chu kan intiamna a ni.
Intiamna kan neih zawh chuan kan tih tur chu a taka hmachhawn a ngai ta. Roberto chu a chevelah a tang a. Thlawhna bung chu hel kualin darthlalang keh them hi a rawn chhar a. Mi pathum hruaiin vurin a hmehkhang ruang lam chu an pan a. An rawn kir leh chuan sa them hi an rawn keng hlawm a.
Gustavo chuan sa ti chu min rawn pe a, ka lo la ve mai bawk a. Sa chu a var deuh vek a, thing ang maia sak leh vawt em em mai hi a ni. He sa hi mihring sa a ni tawh lo, a thlarau a chhuak daih tawh alawm tiin ka rilruah ka inthiam chawp a, ei erawh chu a har kher mai. Ka mitsirin midang chu ka han melh kual a, ka thiante pawh chu an sa ei tur en chungin an lo thu hlawm a. Ei turin chakna an sawmkhawm hi a ni ber awm e. A then erawh chuan an sa ei tur chu an lo thial tawh thung.
Ka huaisenna zawng zawng sawmkhawmin sa chu ka kaah ka dah a. Rim leh tuina a nei lo. Vawi hnih khat lek ka thial hnuah ka lem lui ta a ni. Kan rinna leh puithuna sadai kan thiat a ni tih ka hria a, mahse ka rilrua lian ber chu he thil rapthlak tak lovah chuan thihna bak thlan tur a awm lo tih hi a ni.
Chumi zan chuan kan chetsual atanga a vawikhatna atan beiseina ka nei ta a. Thil rapthlak tak kan hmachhawnin kan paltlang tawh a, dam chhuak tura kan beihna chu kan rin ai dahin a duhawm lo dawn tih ka hre chiang hle bawk. A la damte hian he tlang hi inhnehtir kan tum lo tih kan lantir tawh a, chutih mek lai chuan kan thil tih avangin ka pa lak ata chu hla sawt tlata inhriatna ka nei thung.
A tuk zing karah chuan, transistor hmanga radio kan phuahkhawm hmangin Chile thuneitute chuan min zawnna an chawlhsan thu kan ngaithla a, thupuangtu chuan Andes-a min zawn hnathawh chhunzawm zel chu a hlauhawm em vanga chawlhsan an nih thu te, he tlang vawt tak maiah hian dam chhuak an awm a beiseiawm tawh loh thute a rawn sawi tel bawk a. Hei hi kan chetsual atanga kar hnihna a ni. Kan thu hriat chuan mi thawng kher mai, kan vaiin kan ngawi thap a. Rawn tawng chhuak hmasa ber chu Roy-a a ni a, Min zawn hna an titawp, min beidawnsan ta e, a rawn ti a.
Radio thupuan chuan duhthlan tur engmah min siamsak ta lo. Tihtur pakhat chiah min tuk zawk. He hmun hi chhuahsan ka ngai tih hi. Kalkawngah chuan thi thei ka ni dawn a, mahse ka kal ngei ngei erawh a tul tlat si a, tangkai thei tur bera ka ngaih Roberto chuan min zui tura sawm ka rilruk ta bawk a ni. Andes-a kan tan ni 60-na, December ni 11 tlaiah chuan thlawhna bung pawnah dingin khawthlang lam ka thlir a, he tlang chauh hi keini leh kan in min kardantu chu a ni, tiin ka ngaihtuah a. Ni chu tlang karah a inherliam a, thimna chuan min rawn tihthaih hi a ni ber mai. Ka kal chhuak a nih chuan zan thimah he tlang hi ka hmachhawn dawn tihna a ni a, chu chuan hlauhna hi a rawn thlen nghal a. Thim ka hlau ni lovin zanah he tlang panga kal hi a ngai dawn a, ka lum palh vaih a nih chuan metre 100 tel ka tla thla dawn a, ka thi ngei dawn tih ka chiang.
Mahse chu hlauhna chu hmachhawn ngam lovin he hmunah hian awm ta ila, kan eitur neih a zo ang a, tunge thi hmasa ber ang? Kan vaia thih vek loh chu he hmunah hian hmalam hun kan nei lo. Duhthlan tur dang a awm lo a ni.
Chumi zan chuan Fairchild bungah chuan ka muzal a, ka riah tawpna ber tur a ni. A tukah chuan kal chhuak turin ka insiam a. Kekawr hak thuahin jeans kekawr pathum dang ka keng tel a, ka kawr nghawng nei chungah chuan kawrlumpathum ka hak thuah a, mawza pawh pali lai ka bun a. Ka mawza chu a huh lohna turin sarangin ka tuam a, rugby khelhna pheikhawk bunin lukhum ka khum bawk a. Tanpuitu zawng tur chuan ka inpeih fel ta. Aluminiuma siam thir tlawn chu ka la a, ka ipah chuan sa leh mamawh zualpui tur thenkhat ka dah a. Roberto nen kan rual chuan Antonio-a, Tintin kan tih mai thin chu rawn kal ve tumin a lo insiam zo ve chiah bawk. Khawvel chhim lamah chuan thal a ni tawh a, khua a thiangin van chu a dumpawl mawi hle mai. Ka thiante hnenah chuan, “Tlang lawnna atana khaw duhthusam hi khawhral tam lovin a hmanhmawh thei ang berin i kal teh ang u,” ka ti a, tukthuan kan ei khamah kan thiante nen chuan kan inthlah a, Carlitos chuan min rawn kuah a, “In va thleng thei dawn tih ka hria, Pathianin awmpui cheu rawh se” a ti a.
A mitmengah chuan beiseina a la nei tih ka hmu thei, mahse a taksa chu a dawldangin a cher hle a, a mit te chu a khuar thuk tawh khawp mai. Chuti chunga keini dai ngai lohna hmun kaltlang tura a beiseina awmchhun a la nghat chuan ka hnuk a tiulh kher mai. Midang pawh chuan min rawn kuah a, min rawn fuih bawk a. Kan awmna atang hian Chile chu ke-a kal thlen phak a nih ka rin thu ka sawi thin a, chumi ka rinna leh ka beiseina chuan beiseina a pe ve hlawm te niin ka hria. Mahse ka chhungrilah erawh beiseina chaurau tak a ni a, beidawn aiah tih ang vel chauh hi a ni. Kan inmangtha hnu chuan kan pathum chuan kan chhuak ta a.
Ni thum chhung chu kan thawmhnaw huh hnuang nen vur khang khawn uaih karah kan kal a. A vawtin tha a heh bawk nen, ka ke chu a sai hlak hlak reng a, nikhaw hre lova tluk pawh ka hlat lo hle tih ka hria. Tum khat phei chu, kei mitthi tur hi helai hmunah hian eng nge mawh ka tih ni tiin ka au chhuak nghe nghe. Harsa tak chungin kan pathum chuan tlang chhip kan lawn chhuak thei hram a. Kan kal chak dan ngaihtuahin kan tum ram kan thleng thei dawn lovin kan hria a, Tintin chu kan thawnkir leh ta a, chaw kan tla tur tawk kan ngah loh vang a ni. Tintin chu a lung ni vak lo, mahse kan awmdan kan hrilhin kan hnem a, “Tanpuitu an lo thleng a nih chuan khawthlang lam ngar ngar kan pan dawn a, chulamah chuan min rawn zawng dawn nia.” tiin kan chah a, kan inthen ta a ni.
December ni 19-ah chuan darkar engemaw zat kan kal a, ka pheikhawk chhuat chu a chhe tan tawh a, ka inthuamnaah chuan a tlo lo ber ni dawnin a lang. Tlang atanga chhukthla kan ni tawh a, vawtin min hmehhlum mai a hlauhawm dan a nep tawh bawk a, lo chhia pawh ni se a hmaa kan kalna nena tehkhinin a pawi dan a nep deuh zawk awm e. Tunah chuan chhelna bakah hun leh vanneihna te kan lama a tan chuan dam chhuah theihna remchang kan nei lian hlein ka hria.
Kan chhuk zel a, ruama thing lo ding pawh chu kan hmu thei ta a, Roberto chuan, “Thing karah chuan thil che a awm, bawng niin ka hria.” a rawn ti a. Kei chuan, “Sakhi pawh a ni maithei, i kal zel phawt ang.” ka lo ti ve thung a. A chau tawngkhawng tawh thil a hmusual a nih te ka rinsak zawk. Darkar rei vak lo kan kal leh hnuah chuan leiah thil ka chhar a, soup an dahna bur ruak tuiek tawh hi a ni a, he hmunah hian mihring an lo chetla tawh ngei tihna a ni. “I kal zel ang, loneitute kan hmuh tak tak hunah chauh kan hlim dawn nia, ” ka ti leh a. Kan kal thui zel a, nunna awmna hmun kan thleng tih hai rual a ni lo. Bawng hniak te, sakawr ek te, thing tan bulh tawhna te kan hmu a, kan hma feet 100 velah chuan a hmaa Roberto lo hmuh bawng rual pawh chu kan hmu thei ta a. Roberto chuan, loneitute chenna kan hlat tawh lovang, a ti a, a phurawm duh kher mai.
Chumi tlai chuan tlangah riahbuk kan sual a, Roberto chu a hlim hle a, mahse chutiang chuan rei tak a awm dawn lo tih erawh ka hrethiam sa a, a ke nat thu a rawn sawi a, ka bula chawl hahdam tur leh, a tukah tanpuitu pawh kan hmu tawh ngei ka beisei thu ka hrilh a. A tuk chawhnu lamah chuan Robert chu phul hmunah hnutchhiahin puitu zawng chuan ka kalsan a. Bawng lo tla chu ka va hmu leh a, an lam pana metre 300 vel ka kal hnu chuan lui chhengchhe zet mai hi ka va thleng a. Lui pahnih infinna lai takah ka awm hi a lo ni a, rala kal tur chuan a khawi emaw zawk zawk kan daikai a ngai dawn a. Chu chu kan vahvaihna tawpna tur chu a ni dawn ta a ni. Roberto bulah chuan ka va kir leh a, ka thil hmuh chu kimchang takin ka hrilh a. Sa kha tlem kan la nei a, kan ril a tam tawh bawk si, mihring sa ei aiah bawng chu phil mai kan rilruk hman a. Mahse a neitute chu kan la mamawh dawn avangin an pawi khawih chu tha lo zawkin kan hria a, chubakah min ranw um ni ta se, thui tlan turin chakna kan nei tawh lo. Chumi ni chu kawlah a herliam a, zan a rawn thleng leh ta a.
Khua a vawh deuh avangin meituah tur thing va fawm ka tum a, phul hmuna thui ka thlen hmain Roberto authawm ka hre ta a. “Nando! Sakawr chunga chuangin mi pakhat a rawn kal e” a rawn ti a. Lui lam chu a kawk va bawk a. A kawhna lam pan chuan thim thamah ka va tlan a, ka hnungah chuan Roberto chu a rawn tlan veleh bawk a. Kan din det hnuah tawng thawm kan hre zui ta a ni. MIpa aw a ni a, lui luang thawm karah a rawn au vawn vawn a, a thusawi chu hriat a hrar khawp mai. “Manana” a tih bak chu hriat theih kan nei meuh lo. Mihring aw ngei han hriat chu a lawmawm duh kher mai, chhanhimin kan awm ta tih lantirna te pawh a ni tel bawk awm e.
Kan riahbuk lamah kan kir leh a, tlanga kan kalsante chu ka rilruah an rawn lan gnghal a. Dam chhuak tura an tawrhna hmachhawn tur zawng zawng ka ngaihtuahin ka lainat kher mai. Kan vah chhuah atangin lungkham tur ka ngah bawk a niang, tlanga kan kalsan takte chu ka ngaihtuah ngai meuh lo. A tuk Deember ni 21-a kan tho chu lui bulah chuan mi pathum hian meilum ai chungin min lo nghak reng tawh a. An lam hnaih lui bulah chuan ka zuk tlan thla a, an inthuamna atang chuan loneitu an ni tih hai rual an ni lo. Lui bulah chuan ka zuk au a, mahse tui luang ri avangin ka aw chu an hre thei lova. Pakhat chuan lehkha leh pencil hi lungah a tawn a, ka lamah chuan a rawn vawm kai a. A lehkhaah chuan, mi pakhat in lamah a rawn kal mek, eng nge in duh ni?” tih hi a inziak a. A chhanna chu ka ziak ve nghal a, Uruguay mi ka ni a, tlanga thlawhtheihna tla atangin kan lo kal a, ni 10 hnuah he hmun hi kan lo thleng. Mi 14 te chu hliam neiin kan rawn kalsan a, eitur an nei tawh lo. Kan chau em em a, chhanchhuah kan ngai a ni, tiin.
Lehkha chu ka theihtawpa nain an lamah chuan ka va vawm leh a, lui a kai tawk tawk a ni ber mai. Ka lehkha a chhiar zo chu chu, a kut a rawn vai a, lo nghak rawh a tihna chu ka lo hrethiam nghal mai a. An kalsawn dawnah chuan chhangthawp hi an rawn vawm phei a, Roberto nen chuan kan pawtsawm vek hi a ni ber mai.
Dar 9 velah mi pakhat dang hi Chile police pakhat, sakawr chunga chuang rawn hruai hian a a rawn kal a. Chu hmun atang chuan lak chhuah kan ni a a. A tukah chuan helicopter hmangin kan chetsualna lam chu kan pan zui ta bawk a. Tlangsang takah chuan thlawhna bung a awm a, chutah chuan ka thiante Gustovo, Pedro, Daniel, Fito, Javier te chu an lo la awm thap a. An chauh leh hreawm dan chu sawiin a siak awm love.
Helicopter hmangin tlang atang chuan chhanchhuah kan ni a, sipai hmunpui lamah min kalpui phawt a, chutah chuan doctor leh nurse ten min lo hmuak a. St John of God damdawi in lamah min enkawl zui ta a ni. Kan thawmhnaw tawp tak tak mai an hlip a, tuisa ver vawrin min bual a, chutah chuan ka nakurk zawng zawng chu vunin a tum der der tih tur khawpin ka cher tih ka hre chhuak ta chiah nghe nghe a. Ka kiu leh ka khup te chu a bawk hian a bawk luau mai a, Thihna kotlangah kan ding a, mahse ka la dam e, ka ti ta a.
Damdawi inah chuan ka farnu Graciela-i aw ka hria a, rawn luh tumin hmanhmawh takin a rawn tlan a, a hnungah chuan ka pa chu a rawn kal ve bawk a. An pahnih chuan ka kuah a, kan lung a chhe kher mai. Ka nu leh ka farnu sun hun a ni ta a, mahse thil mak tih rual lohvin a suna zawk ni lovin a suntu zawkah ka awm thei ta thung a ni.
