Tun hnaia Champhai District chhunga Ruah leh thliin in a tihchhiatte chhawmdawlna thawhkhatna chu vawiin khan Champhai Bawrhsap Pu James Lalrinchhana hmalakna-in sem chhuah tan a ni.
Chhawmdawlna thawhkhatnaah hian State Disaster Response Fund leh National Disaster Response Fund atangin chhungkaw 39-te hnenah Cheng 11,18,000 pek chhuah phawt a ni a, In luah zui tlak loha chhia in 7-te Cheng 1,30,000 pek theuh niin thawm thata luah zui leh mai theih chhungkaw 32-te chu cheng 6,500 pek theuh an ni bawk.
Chhawmdawlna hi thawm thata luah zui leh mai theih Champhai Vengsangah chhungkaw 15, Dintharah 10, Kanan Vengah 3, Bethel Vengah leh Jail Vengah 2 ve ve pek an ni a; Luah zui tlak loha chhia Vaphaiah leh New Champhaiah chhungkaw 2 ve ve, Vengthlang, Hnahlan leh Vaikhawtlangaah chhungkaw 1-te chhawmdawlna hi pek an ni.
March ni 31 leh April ni 1-a To thli leh ruah thawk khan Champhai District chhungah In 144 a tichhia a, heng zinga 7-te chu luah zui tlak loa chhia a ni a, in 137 te chu thawm thata luah zui leh mai theih a ni a, Mimal in bakah hian School, Kudam, Anganwadi Centre, Biak In, Hall leh pavillion chhia zawng zawng 19 a tling bawk a. Raltlan Camp Khawbungah 5, Farkawnah 7, Bulfekzawlah leh Buangah 1 ve ve a chhe bawk a; He chhiatna hian Champhai District chhungah mi 670 a nghawng nia hriat a ni
