31st March 2024: Tukin zinga thli tleh chuan Khawzawl District chhung hmun hrang hrangah nunphung a tikhaihlak nasa hle a. Thli tleh hian chenna in engemawzat a tichhia a, Biak in, sikul leh vawk in chhia pawh a awm nual bawk. He thu ziah lai hian thli tleh vanga in chhia 71 report tawh a ni a, vanneihthlak takin nunna chan erawh an awm lo a ni.
DC office-in Khawzawl distric chhunga chhiatna thleng report an dawn tawh chin hi, Aiduzawlah 2, Chalrangah 2, Chhawrtuiah 4, Khawzawlah 15, Hmunchengah 8, Kawlkulhah 2, Khawhaiah 1, Khualenah 1, Lungtanah 5, Tlangpuiah 1, Vanchengpuiah 4, Vangtlangah 8, Sialhawkah 19 a awm a ni.
Thli tleh vanga chhiatna thleng a hriat veleh 22-Tuichang bialtu MLA Pu W Chhuanawma, Dy Govt Chief Whip chuan Khawzawl Bawrhsap Pu K. Lalrohlua be nghalin vanduaina tawk te chhawmdawl dan tur ruahmanna an siam dun nghal a. Village Council hrang hrang ten DC Office-ah an huamchhunga chhiatna thleng te an report a, Zonal Officer ten an bial chhunga chhiatna thlenna hmun te an tlawh bawk. Hriat theih chin ah hetiang hi vawiin thli tleh in a tih chhiat te an ni.
