MZP chuan Mizoram Public Service Commission (MPSC)-in February ni 1, 2024-a result a tihchhuah tak Combined Competitive Examinations kalpui danah thil fel tawk lo leh chhui chian ngai thil a awm ngeiin a hria a. Mizoram-a hna sang leh zahawm tak tak latu MPSC chhûngah hetiang thil hriat tur a awm chu pawi an tih thu an sawi.
MZP chuan Mizorama hna sang leh zahawm tak takte lak hna, MPSC-in tun thlenga rintlak taka hei leh chen a kalpui chu lawmawm an tih thu sawiin Thalai hna zawng mekte pawhin an rintawk hle laiin Combined Competitive Examinations kalpui hnuhnung berah thil dik tawkloa hmalakna awm ngeiin MZP chuan a hria a, a ngai thutak hle tih an sawi a, MZP chuan ngunthluk zawka zirchiana, MPSC hi thalai hna zawng mekten an rin ngam zel theihna turin a tawp thlengin hma a la zel dawn niin an sawi a; MZP chuan tun hnaiah, NIT Mizoram Asst. Registrar leh AMC hnuaia hna lakah hrang hrangah a buaipui tute’n an laina hnai duhsak zawngte thun an tum avangin hma a la a. MPSC-ah hetiang a lo awm veleh chu pawi an tih thu an sawi bawk.
