Pu Liansangzuala, Special Court Judge, ND&PS Act Champhai chuan Heroin neitua puh Rosiamliana chu thiam loh a chantir a, kum 10 chhung Lung in tang tur leh cheng Nuai 1 chawi turin a hrem.
Kum 2021, March ni 16 khan Champhai Police-te chuan Mualkawi daiah Champhai leh Aizawl inkar Servicee Maxi cab pakhhat atangin Heroin Gram 391-a rit manin a neitua puh Maxi cab khaltu Rosiamliana, Zokhawthar khua chu an man bawk a; Champhai Police Station–ah ND&PS Act tlawhchhana thubuai ziah luh niin Heroin hi Sample lak a nih hnuah FSL thawn a ni a, Heroin ngei a ni tih finfiah a nih hnuah Court-ah thubuai thehluh a ni.
Court chuan thu hrethu hrang hrangte thusawi a ngaihthlak hnuah Rosiamliana hi Heroin neitu ni ngeiah ngaiin Section 21 (c)/25 ND&PS Act hnuaiah thiam loh a chantir a, nimin thawhlehni khan Rosiamliana hremna hi puangin kum 10 chhung Lung in tang tur leh cheng Nuai 1 chawi turin a hrem a, a pawisa chawi tur hi a pek tlak theih loh chuan thla 6 dang a tan belh leh dawn a ni.
