‘Sorkar hmasain a ngaih pawimawh mau chu tun sorkarin a hman tangkaina em em a neih a hre lo’ – Horticulture Minister
Horticulture Minister Prof. Lalnilawma chuan Bamboo Link Road laih nan cheng 1,05,00,000 hman ral a nih thu House a hrilh a, sorkar hmasain a ngaih pawimawh mau chu tun sorkarin a hman tangkaina em em a neih a hre lo niin a sawi.
Horticulture Minister Prof. Lalnilawma chuan Dr. K Beichhua, Siaha bialtu zawhna chhangin Horticulture Department hnuaiah Bamboo Link Road te mau chinna khua, Hmunpui ram chhung, Saiphai zau leh Hmunpui khaw bulah te laih niin House a hrilh a, Bamboo Link Road laih nan cheng 1,05,00,000 hman ral niin a sawi a, Zawhna neitu bakah V Malsawmtluanga, Lunglei North bialtu leh Pu Robert Romawia Royte, Hachhek bialtute zawh belhna te chhangin Horticulture Minister chuan, sorkar hmasa ngaihpawimawh mau chu tun sorkar in a hman tangkaina em em a neih a hre lo niin a sawi a, tuna neih sa te hman tangkai dan an zir a, official te nen Taiwan-ah te an zirchiang a, project te siamin tual chhung mau hman \angkai dan tur zirin hma an la mek niin a sawi.
Prof. Lalnilawma chuan, mau atangin ethanol siam tumin proposal siam an awm a, invest duh an awm a, UK base company in mau atanga bio-charcol siam a duh tih investment an tih duh tih sawiin ngaihtuah an tum niin a sawi a. Bio-ethanol leh bio-charcol te, bamboo charcoal atanga fibre siam te rilru-ah a awm a, engtiang chiaha kalpui tur nge sorkar in ngaihtuah dawn a. Mizoramin mau a neih sa te mumal taka enkawl a ngai a, inchuh buai theih thil a nih avangin kalphung nghet tak neih a ngai niin a sawi.
Horticulture Minister chuan, Mizorama mau te state danga thawn chhuah khap leh khap loh chu an department tih tur a ni chiah lo niin a sawi a, National Bamboo Mission hnuaia mau chi supply zat a record a nei chiah lo a, a chi erawh 9,10,725 a phun a, a hmunin a zir loh vang nge, khaw lum vang nge, a phunna pui ber Hmunpuiah chuan 70% vel dam khaw chhuaka ngaih a nih thu a sawi a. Mau chi buaipui nan cheng 6,48,16,750 sen ral niin a sawi a, Bamboo link road-ah chuan an department-in an chhan theih a chhang a, department dangin an ti ve a nih chuan an hriatpui lo niin a sawi bawk.
