“Football khelmual tling loa siam a ni chu Sports hmangaihna atangin a uiawm’ – Sports Minister, Lalnghinglova Hmar
Sports & Youth Services Minister Lalnghinglova Hmar chuan sum tam tak senga Football khelmual tling loa siam a ni chu Sports hmangaihna atangin uiawm a tih thu House a hrilh.
South Tuipui bialtu MLA Jeje Lalpekhlua’n khelmual len zawng tling lo engzat nge siam awm tih a zawhna chu Sports Minister Pu Lalnghinglova hmar chuan chhangin Football khelmual tling lo thil sawi harsa ve deuh a awm tih a sawi a, pawm theih chin chu Metre 90 leh 45 ni mah se, mi 9 field pawh tiat lo a ni a, International standard-a pawm theih chin chu Metre 100 leh 64 a nih thu a sawi a, Smart city Project hnuaia Football khelmual siam zinga mi Endentharah Cheng Vbch 8.8 sengin Metre 90 leh 45 siam a ni a, Chite-ah cheng Vbch 8.9 sengin Metre 100 leh 52 siam a ni a, Hlimen-ah cheng Vbch 6.81 sengin Metre 90 leh 45 siam a ni a, Tuivamit-ah metre 90 leh 45 siam a nih thu a sawi.
Keifangah cheng Vbch 583-in Metre 105 leh 69 bakah Lengpuiah cheng Vbch 5-in Metre 105 leh 68 FIFA duh ang thlapa siam a nih theih laia Smart City Project hnuaiah Sport pawisa ni chiah lo mah se, sports atana siam nise a ground tling lo lutuk chu sports hmangaihna atangin uiawm a tih thu a sawi a, an endik tum pawhin ‘TT board phel in pe ngai em ni? Badminton Court tling lo in siam ngai em ni? engatinge Football ground a nih tak avanga te lutuk in siam ti-a a au chhuah hial thu leh National competition thleng thei lo a, Cheng Vbch 8 vel sen chu a lutuk deuh a, national level-a pawm theih tur talin i siam rem ang u’ tih chu an au hla a nih thu a sawi a, a zauh theih ang angin an zauh dawn niin a sawi bawk.
Thingtlang kil khawra infiamna coaching pek chu ruahman dan chuan April ni 1 atangin tan theih an tum tih sawiin tunah hian kalpui mek a ni a, coach-te chu a tangkai thei ang bera hman an duh avangin an pual bikin meeting an nei tawh niin a sawi a; Coach-te’n thingtlang kil khawra an thlen chu an duh dan a ni thu sawiin dil theih an an ni a, thingtlang naupangte’n coaching tha an dawn theihna turin hmalak an tum thu a sawi a, coach dah belh tumna tunah rih chuan a awm lo a, sorkar sum leh pai dinhmun thlir chungin an ngaihtuah chhunzawm dawn niin a sawi bawk.
TBC Lalvenchhunga zawhna Sports infrastructure chungchang chu chhangin Sports Minister chuan state sorkarin sum a tum ve tur ang chi-ah chuan thupui berah an nei rih dawn lo tih a sawi bawk.
